June 25, 2019

ඡන්ද පෙරදැරි කර ගනිමින් ආණ්ඩුවේ වියදම් වැඩිකිරීම, එම වියදම් පියවීමට මහා පරිමාණයෙන් ණය ගැනීම, හා එම ණය ගෙවීමට මහා පරිමාණයෙන් බදු ගැසීමේ විෂම චක්‍රයක් වත්මන් ආණ්ඩුව විසින් සිදු කරන බවට සඳහන් කරමින් විපක්ෂ නායක මහිව්ද රාජපක්ෂ මහතා නිවේදනයක් නිකුත් කර ඇත.
 
ජනතාවට විවිධ සහානාධාර සහ දිමනා ලබා දිමට 2019 අයවැයට අනුව නියමිත තිබේන බවත් ඒ සියල්ල සිදු කර ඇත්තේ 2019 වසර මැතිවරණ වසරක් හේතුවෙන් නිසා බවට සැකයක් පවතින බවද විපක්ෂ නායකවරයා එම නිවේදනයේ සඳහන් කර තිබේ.

අයවැය අනුව ආණ්ඩුව විසින් තවත් පවුල් 600,000කට සමෘද්ධි ප්‍රතිලාභ ලබා දීම සාධාරණීකරණය කරන්නේ දේශපාලන හේතුන් මත සමෘද්ධි ලාභීන් විය යුතු පවුල් විශාල ගණනකට එම ප්‍රතිලාභ අහිමි කර තිබු බව කියමින් බවත් මේ ආකාරයට දිගුකාලයක් තිස්සේ පැවතුනා යැයි කියන අසාධාරණයක් ආණ්ඩුවේ අවධානයට යොමු වී ඇත්තේ අවුරුදු හතරකට වඩා කාලයක් රට පාලනය කිරීමෙන් පසුව වීම මවිතයට හේතුවක් බවද එම නිවේදනයේ සඳහන් කර ඇත.

ආණ්ඩුව මේ ගැන කරන ප්‍රකාශ වලින් පැහැදිලි වන්නේ අලුතින් බඳවා ගන්නා සමෘද්ධි ලාභින් 600,000,  දේශපාලන නිර්ණායක මත තෝරා ගන්නා අය විය යුතු බවද මහින්ද රාජපක්ෂ මහතා එහිද සඳහන් කර තිබේ.

මෙවැන්නක් ඔවුන් කරන්නේ දුගීභාවය තුරන් කිරීම පෙරදැරි කරගෙන නනෙ බවත් ඡන්දය පමනක් පෙරදැරි කරගෙන බව පැහැදිලි බවත් විපක්ෂ නායක මහින්ද රාජපක්ෂ මහතා වැඩිදුරටත් එහි සඳහන් කර ඇත.

විපක්ෂ නායක මහින්ද රාජපක්ෂ මහතා නිකුත් කළ සම්පුර්ණ නිවේදනය පහත සඳහන් වේ.

Sinhala 2019 Budget by on Scribd

වර්තමානයෙහි රටේ ඇත්තේ අග්‍රාමාත්‍ය රනිල් වික්‍රමසිංහ මහතාගේ ආණ්ඩුවක් නොව ජනාධිපති මෛත්‍රීපාල සිරිසේන මහතාගේ ආණ්ඩුවක් බැවින් අයවැයෙහි වගකීම ද ජනාධිපතිවරයා විසින් භාරගත යුතු බව විපක්ෂ නායක මහින්ද රාජපක්ෂ මහතා පවසයි.

මහින්ද රාජපක්ෂ මහතා මේ බව පැවසුවේ අයවැයෙන් අනතුරුව පාර්ලිමේන්තු සංකීර්ණයේදී මාධ්‍ය අමතමිනි.

ශ්‍රී ලංකා නිදහස් පක්ෂය අයවැයට ඡන්දය ප්‍රකාශ කිරීමෙන් වැළකී සිටීමේ තීන්දුව ජනාධිපතිවරයා විසින් ගත් එකක් බව මහින්ද රාජපක්ෂ මහතා ප්‍රකාශ කළේය.

මේ අනුව ශ්‍රීලනිප - පොහොට්ටු සාකච්ඡා අසාර්ථක වේදැයි මාධ්‍යවේදීන් නැඟූ ප්‍රශ්නයට පිළිතුරු දෙමින් ඒ මහතා පැවසුවේ සාකච්ඡා අසාර්ථක නොවන බවත් සියළු දෙනාම එක්ව අවසානයේ සටනට බසින බවත්ය.

අයවැය තෙවන වර කියවීමේ ඡන්ද විමසීම වැඩි ඡන්ද 45කින් සම්මත වුණි.

අයවැය තෙවන වර කියවීමේ ඡන්ද විමසීම අද පස්වරුවේ සිදුවූ අතර ඡන්ද විමසීම පැවැත්වුණේ විද්‍යුත් ක්‍රමයටයි.

එහිදී අයවැයට පක්ෂව මන්ත්‍රීවරුන් 119 දෙනෙකු ඡන්දය ප්‍රකාශ කළ අතර මන්ත්‍රීවරුන් 74දෙනෙකු ඊට විරුද්ධව ඡන්දය ලබා දුන්නේය.

ඒ අනුව 2019 අයවැය තෙවන වර කියවීමේ ඡන්ද විමසීම වැඩි ඡන්ද 45කින් සම්මත වුණි.

මෙහිදී අයවැයට පක්ෂව ඡන්දය ලබාදුන්නේ එක්සත් ජාතික පක්ෂය, දෙමළ ජාතික සන්ධානය හා ශ්‍රී ලංකා මුස්ලිම් කොංග්‍රසයයි.

 

ළමා ඉතුරුම් ගිණුම්වලින් පොළිය මත බදු අයකරන්නේ මාසික පොළී ආදායම රුපියල් 5,000ට වැඩි නම් පමණක් බව මුදල් අමාත්‍ය මංගල සමරවීර මහතා පවසයි.

මාසික පොළී ආදායම රුපියල් 5,000ක් වීමට නම් අදාළ දරුවාගේ ගිණුමේ රුපියල් ලක්ෂ 12ක්වත් තැන්පතු තිබිය යුතු බව පැවසූ අමාත්‍යවරයා එතරම් මුදලක් ඇති ගිණුමකට පොළිය ලෙස ලබෙන රුපියල් 5,000න් 5%ක් බදු ලෙස අයකර ගැනීමේ වරදක් තමන් නොදකින බවයි ප්‍රකාශ කළේය.

"පොහොසත් බබාලා වේලාසනින්ම පුරුදු වෙන්න ඕනේ ආදායම් බදු ගෙවන්න. මොකද වයසක බබාලා බවට පත්වුණාම තාමත් ඒ අය බදු නොගෙවා ඉන්නේ ඒ නිසා වෙන්න ඇති." යනුවෙන් ඒ මහතා සඳහන් කළේය.

උසස් පෙළ ඉහළම ප්‍රතිඵල ලබාගන්නා සිසුන්ට විදෙස් විශ්වවිද්‍යාලවල අධ්‍යාපනය ලැබීම සඳහා ශිෂ්‍යත්ව ලබාදීම 2019 අගෝස්තු විභාගයට පෙනී සිටින සිසුන්ගෙන් ආරම්භ කරන බව පැවසූ අමාත්‍යවරයා සිසුන් 14 දෙනෙකුට අවස්ථාව ලැබෙන බවත් එක් සිසුවකු සඳහා රුපියල් කෝටි 5ක මුදලක් වැය කෙරෙන බවත් ප්‍රකාශ කළේය.

ඔවුන් අධ්‍යාපන කටයුතු අවසන් කර වසර 3ක් තුළ නැවත ශ්‍රී ලංකාවට පැමිණිය යුතු බවටත් එසේ පැමිණ වසර 10ක්වත් අවම වශයෙන් ශ්‍රී ලංකාවේ සේවය කළ යුතු බවටත් ගිවිසුමක් අත්සන් තබා එම ශිෂ්‍යත්ව පිරිනමන බවයි අමාත්‍යවරයා පැහැදිලි කළේය.

අයවැය දෙවන වර කියවීම වැඩි ඡන්ද 43කින් අද පාර්ලිමේන්තුවේදී සම්මත වුණි.

අයවැයට විපක්ෂව ඡන්ද 119 ක් හිමි වූ අතර පක්ෂව හිමි වුණේ ඡන්ද 76ක් පමණයි.

දෙමළ ජාතික සන්ධානය සහ ජනතා විමුක්ති පෙරමුණ මෙහිදී අයවැයට විරුද්ධව ඡන්දය භාවිතා කළේය.

මුදල් අමාත්‍ය මංගල සමරවීර මහතා විසින් පසුගිය 05 වනදා මෙම වසර සදහා වන අයවැය යෝජනාවලිය පාර්ලිමේන්තුවට ඉදිරිපත් කරනු ලැබුවේය.

ඒ අනුව අද දක්වා අයවැය දෙවන වර කියවීමේ විවාදය පැවති අතර මංගල සමරවීර මුදල් අමාත්‍යවරයාගේ පිළිතුරු කථාවෙන් අනතුරුව ඡන්ද විමසීම පැවැත්වුණි.

අයවැය තෙවන වර කියවීමේ  විවාදය හෙවත් කාරක සභා අවස්ථා විවාදය හෙට සිට අප්‍රේල් මස 05 වන දින දක්වා පැවැත්වෙන අතර එදිනම අයවැය තෙවන වර කියවීමේ ඡන්ද විමසීම සිදුකරයි.

මෙවර අයවැයට විරෝධය පළ කිරීමට එක්සත් ජනතා නිදහස් සන්ධානය විසින් තීරණය කර ඇති බව පාර්ලිමේන්තු මන්ත්‍රී ලක්ෂ්මන් යාපා අබේවර්ධන මහතා සඳහන් කළේය.

අද(12) පෙරවරුවේ එක්සත් ජනතා නිදහස් සන්ධාන පාර්ලිමේන්තු මන්ත්‍රී කණ්ඩායම රැස්වී එකඟතාවකට පැමිණෙන බව ඒ මහතා පැවසීය.

මේ අතර ජනතා විමුක්ති පෙරමුණ ද මෙවර අයවැයට විරුධව ඡන්දය ප්‍රකාශ කිරීමට තීරණය කර තිබේ.

මේ අතර අයවැය දෙවන වර කියවීමේ විවාදය ඊයේ දිනය පුරා පැවති අතර එහිදී ජනාධිපතිවරයාගේ වැය ශීර්ෂය සම්බන්ධයෙන් විවිධ අදහස් පල වුණි.

පාර්ලිමේන්තුවට ඉදිරිපත් කර තිබෙන අයවැය යෝජනාවලිය ඉතාමත් හොද අයවැයක් බව හිටපු ජනාධිපතිනි චන්ද‍්‍රිකා කුමාරතුංග මහත්මිය පවසයි.

ඈත පලාත්වල සිටින දිළිදු ජනතාවගේ දිලිදුකම තුරන් කිරීමේ වැඩපිලිවෙලක් ඇති බවද ඇය කියා සිටීයාය.

උත්සව සභාවක් අවසානයේ මාධ්‍ය වෙත අදහස් පල කරමින් ඇය මෙම අදහස් පල කලාය.

අද වන විට කඩා වැටී ජරා වී තිබෙන ශ‍්‍රී ලංකා නිදහස් පක්‍ෂය ගොඩගැනීමට තමන් උදවු කරන බවද ඇය එහිදී කියා සිටියාය.

ශ්‍රී ලංකාවේ ඇත්තේ ආර්ථික අර්බුදයක් නොව ආර්ථිකය හමුවේ ඇති අභියෝග පමණක් බව මුදල් අමාත්‍ය මංගල සමරවීර මහතා ප්‍රකාශ කරයි. ඔක්තෝබර් 26 සිදුවීම හේතුවෙන් ආර්ථික අර්බුද පැන නැගුණ බවත් ආණ්ඩුව යළි බලයට පත් වීමෙන් පසු එම අර්බුද සමනයට පියවර ගත් බවත් හෙතෙම පෙන්වා දෙයි.

අමාත්‍යවරයා මේ බව කියා සිටියේ 2019 අයවැය පිළිබඳ දැනුම්වත් කිරිම සඳහා ඊයේ (07) මුදල් අමාත්‍යාංශයේ පැවැති මාධ්‍ය හමුවේ දී ය.

එහිදී ඒ මහතා මෙසේ අදහස් දැක්විය.

‘‘මෙය මැතිවරණ වර්ෂයක් බව අමුතුවෙන් කිව යුතු නෑ. නමුත් අපි මේ ඉදිරිපත් කළ අය වැයේ ඇති සහන මැතිවරණය ඉලක්ක කරගෙන ලබා දුන් සහන නෙවෙයි. අයවැය ගැන වෙනදට කෑ ගහන විපක්ෂය පාර්ලිමේන්තුවෙ දි නිහඩව විසිරී ගිය ආකාරය අපි දැක්ක. ඔවුන්ගෙ ප්‍රතිචාර වගේ ම අයවැය ඉදිරිපත් කරල ගෙවුණ දවස් කිහිපයට ලැබුණ ප්‍රතිචාර ගැන සතුටුයි. සැබැවින් ම අපි ඉදිරියේ ඇත්තේ ආර්ථික අර්බුදයක් නෙවෙයි. ආර්ථික අභියෝග තමයි තියෙන්නෙ. විශේෂයෙන් ම ඔක්තොබර් 26 පත්වුණ ආණ්ඩුව දින 51ක් තුළ සිදු කළ හානිය යළි සකස් කරන්න අපි කටයුතු කළා. රුපියල ස්ථාවර කර ගන්න පමණක් ඔවුන් ඩොලර් බිලියනයක් පමණ වැය කළා. ජාත්‍යන්තර මූල්‍ය අරමුදල තමන්ගෙ ගිවිසුම්වලින් ඉවත් වුණා. පස්සෙ මම වොෂිංන්ටන් නුවරට ගිහින් ජාත්‍යන්තර මූල්‍ය අරමුදල් ප්‍රධානීන් හමුවෙලා සාකච්ඡා කළාට පස්සෙ තමයි ඔවුන් ශ්‍රී ලංකාවට පැමිණියේ. අපි අයවැයෙන් රාජ්‍ය සේවකයන්ට රුපියල් 2,500ක දීමනාවක් ලබා දීල තියෙනවා. 2015 දී අපි ආණ්ඩුව භාර ගන්නකොට රාජ්‍ය සේවයේ කාර්යාල කාර්ය සහයකයෙක් ලබා ගත්ත මූලික වැටුප රුපියල් 11,730යි. එය අද වෙද්දි රුපියල් 21,740 දක්වා ඉහළ ගිහින් තියෙනවා. එදා රුපියල් 16,000ක වැටුපක් ලබා ගත්ත ගුරුවරයෙක් අද රුපියල් 29,000ක් ගන්නවා. අමාත්‍යාංශ ලේකම්වරයකුගේ වැටුප රුපියල් 48,000 සිට 88,000ක දක්වා ඉහළ ගිහින් තියෙනවා. 2015 – 2020 අතර වැඩි වුණ තරම් වැටුපක් රාජ්‍ය සේවයකු ඉතිහාසයේ කවදාවත් වැඩි වෙලා නෑ. 2015ට සාපේක්ෂව 2020 වෙද්දි රාජ්‍ය සේවක මූලික වැටුප 107%කින් ඉහළ ගිහින් තියෙනවා. ඊට අමතරව අයවැයෙන් ප්‍රකාශ කරපු පරිදි ජුලි මාසෙ 01 සිට තවත් රුපියල් 2,500ක් ලැබෙනවා."

"යුධ හමුදාපතිතුමා එක්ක සාකච්ඡා කරපු අවස්ථාවෙ මට තේරුණා වසර විස්සකින් විතර ඇතැම් දීමනා වැඩි වෙලා නෑ කියල. උදේ දවල් රෑ තුන් වේල යුද්ධය විකුනගෙන කාපු මහින්ද රාජපක්ෂ ආණ්ඩුව කටයුතු කළා හමුදා සාමාජිකයන් ගැන තියල තියෙන්නෙ එහෙමයි. අපි කමාන්ඩෝ දීමනාව රුපියල් 5000 දක්වා ඉහළ දැම්ම. ගෙවල් කුලී දීමනාව 100%කින් ඉහළ දැම්ම. නිල ඇදුම් දීමනාව වැඩි කළා, රණවිරු දීමනාව වැඩි කළා.උගතුන්ගේ දේශයක් අපි බිහි කළ යුතුයි. ඔවුන්ගේ වරද නිසා නොවෙයි පාලකයන්ගේ වරද නිසා විශ්ව විද්‍යාලවල ඉඩ පහසුකම් නැතිකම නිසා විශ්ව විද්‍යාලට ඇතුළුවෙන්න බැරි වෙන පිරිස වෙනුවෙන් පෞද්ගලික උපාධි ආයතන වෙතින් සිය උසස් අධ්‍යාපන කටයුතු කරගෙන යන්න රුපියල් ලක්ෂ 11ක පොලී සහන ණයක් අපි ලබා දෙනවා. වසර දෙකක සහන කාලයකින් පස්සෙ වසර 15ක් දක්වා මේ ණය ගෙවන්න අවස්ථාව ඔවුන්ට හිමි වෙනවා. ඒ වගේ ම අපි අරමුදලක් බිහි කරනවා උසස් පෙළ ඉහළින් ම සමත්වෙන සිසුන්ට ලෝ ප්‍රකට විශ්ව විද්‍යාලවල අධ්‍යාපන ලබා ගැනීම සඳහා. විෂය ධාරා අනුව ශ්‍රී ලංකාවේ පළමු ස්ථානයට පත්වන දරුවන් පස් දෙනාට වගේ ම පළාත් 9 ප්‍රථම ස්ථානයට පත් වෙන දරුවන් 9 දෙන ඇතුළු 14 දෙනෙකුට මේ අවස්ථාව ලබා දෙන්න අපි මෙවර උසස් පෙළ විභාගත් සමග සූදානම් වෙනවා."

"අදාළ විශ්ව විද්‍යාල සමග මූලික සාකච්ඡා අපි ආරම්භ කරල තියෙනවා. මේ ආකාරයට එන්ටප්‍රයිස් ශ්‍රී ලංකා වැඩසටහන තව දුරටත් ශක්තිමත්ව ක්‍රියාත්මක වෙන අතර බැංකු නිලධාරීන් සමග මම අදත් කතා කළා ණය ලබා ගැනීමට එන පිරිසට එම ණය ලබා දීමට අවශ්‍ය පහසුකම් සැලසීම ගැන. ණය අයදුම්කරුවෙකුට කුමක් හෝ ගැටලුවක් මතු වුණොත් අපට දැනුම්වත් කරන්න අපි 1925 විශේෂ දුරකතන විවෘත කළා. පැමිණිල්ලක් දිනක් ඇතුළත අමාත්‍යාංශයට වගේ මට ලැබෙනවා. ඒ අනුව අපි කටයුතු කරනවා. ඒ නිසා දැන් දැන් පැමිණිලි ලැබිම අඩු වෙමින් තියෙනවා. තව දුරටත් එන්ටප්‍රයිස් ශ්‍රී ලංකා වැඩසටහන පිළිබඳ දැනුම්වත් කිරීම සඳහා අපි ජංගම සේවයක් ආරම්භ කරනවා. ණය ලබා ගැනීමට අදාළ රජයේ පාර්ශ්වයන් මේ සේවාව සඳහා සහභාගී කරවාගෙන නව ව්‍යවසායකයන් බිහි කිරීමට අවශ්‍ය ශක්තිය ලබා දීම අපේ අරමුණයි. මෙහි මංගල අදියර මේ මාසෙ 16 – 17 වැලිගමින් ආරම්භ කරනවා. ගොඩක් දෙනා මම දැකල තියෙනවා මෙන්න බදු ගහනවා කියල කෑ ගහනවා. ශ්‍රී ලංකාව කියන්නෙ අඩුම බදු ගන්න රටක්. ඒ වගේ ම තොටිල්ලේ ඉඳල මරණ මංචකය දක්වා රජයේ වියදමෙන් සහන දෙන රටක් මේ. සෞඛ්‍ය නොමිලේ, අධ්‍යාපනය නොමිලේ. රටේ ඉන්නව මිලියන 22ක ජනතාවක් බදු ගොනු තියෙන්නෙ 246000යි. මේ මට්ටම ලක්ෂ 10 දක්වා වත් වැඩි කළ යුතුයි. බදුවලින් 82%ක් තියෙන්නෙ වක්‍ර බදු. ඒ නිසා මේ බදු පදනම පුළුල් කළ යුතුයි. බදු කියන්නෙ සමාජ වගකීමක්."යැයිද ඒ මහතා වැඩිදුරටත් පැවසිය.

ජනාධිපති, අගමැති, විපක්ෂනායක යන සියලු තනතුරුවල වැය ශිර්ෂ සියල්ලම ඇත්තේ එකට වන හෙයින් ජනාධිපතිවරයාගේ වැය ශීර්ෂය පමණක් පරාජය කරන්නට හැකියාවක් නැතැයි අභ්‍යන්තර ස්වදේශ කටයුතු පළාත් සභා සහ පළාත් පාලන රාජ්‍ය ඇමැති ජේ.සී.අලවතුවල මහතා මාධ්‍ය හමුවකදී ඊයේ (7) පැවැසීය.

ජනාධිපති වැය ශීර්ෂය පරාජය කරන බවට එක්සත් ජාතික පක්ෂ පසුපෙළ මන්ත්‍රීවරුන් කර තිබූ ප්‍රකාශය පිළිබඳව මාධ්‍යවේදීයකු ඇසු ප්‍රශ්නයකට පිළිතුරු දෙමින් රාජ්‍ය අමාත්‍යවරයා පැවසුවේ එලෙස ජනාධිපති වැය ශිර්ෂය පරාජය කරන්නට හැකියාවක් නැති බවයි.

පසුපෙළ මන්ත්‍රීවරුන් තම පෞද්ගලික අදහස් ක්‍රියාත්මක කරනවාදැයි නොදන්නා බව කී රාජ්‍ය ඇමැතිවරයා පාර්ලිමේන්තුවේදී කටයුතු කළ යුත්තේ රජයක් ලෙස සිතා බවද කීය.

ජනාධිපතිවරයා යටතේ පවතින අමාත්‍යංශවල වැය ශීර්ෂ පරාජය කිරිමට හැකියාවක් පවතින නමුත් ඒවාහි තීරණයක් ද ගෙන නැතැයි රාජ්‍ය ඇමැති ජේ.සී.අලවතුවල මහතා සඳහන් කළේය.

පිටකෝට්ටේ සිරිකොත එක්සත් ජාතික පක්ෂ  මුලස්ථානයේ දී මෙම මාධ්‍ය හමුව පැවැත්විණි.

මෝටර් රථ වාහන සඳහා අයකරනු ලබන බදු තවදුරටත් ඉහළ නැංවීමට මෙවර අයවැය 2019 තුළින් යෝජනා වී තිබේ. අදාළ අයවැය යෝජනාවෙහි මෙසේ සඳහන් වේ.

“මෝටර් රථ වාහන සඳහා වන නිෂ්පාදන බදු සහ සුඛෝපභෝගී වාහන ආනයන බදු 2019 මාර්තු 06 දා සිට බලපැවැත්වෙන පරිදි සංශෝධනය කරනවා. එසේ වුදව කුඩා එන්ජින් ධාරිතාවන් සහිත මෝටර් වාහන සඳහා මෙම සංශෝධනය මගින් ඉතා අවම බලපෑමක් සිදුවේ. මෙයට අතිරේක වශයෙන් වාහන ආනයනය සඳහා පනවා ඇති සියයට 200 ක ආන්තික මුදල් තැන්පතු නුදුරු අනාගතයේ දී ඉවත් කරනු ඇත.“

ඒ වාහන මිල ගණන පහත පරිදි සංශෝධනය වනු ඇත.

පෙට්‍රල් වාහන

සිලින්ඩර ධාරිතාව 800 ට අඩු පෙට්‍රල් වාහන සඳහා නිෂ්පාදන බද්ද රු. 150,000 කින් හා සිලින්ඩර ධාරිතාව 1000 ට අඩු පෙට්‍රල් වාහන සඳහා නිෂ්පාදන බද්ද රු. 175,000 කින්ද, සිලින්ඩර ධාරිතාව 1300 ට අඩු පෙට්‍රල් වාහන සඳහා නිෂ්පාදන බද්ද රු. 500,000 කින් ද වැඩි කෙරේ.

හයිබ්‍රිඩ් වාහන

සිලින්ඩර ධාරිතාව 800 ට අඩු දෙමුහුන් වාහන මත නිෂ්පාදන බද්ද රු. 250,000 කින් හා සිලින්ඩර ධාරිතාව 1500 ට අඩු දෙමුහුන් පෙට්‍රල් වාහන මත නිෂ්පාදන බද්ද රු. 500,000 කින්වැඩි කෙරේ.

විදුලි වාහන

කි.වො. 70 මෝටර් වාහන මත නිෂ්පාදන බද්ද රු. 175,000 අඩු කෙර්.

ත්‍රීරෝද රථ

සිලින්ඩර ධාරිතාව 200 ක් වන ත්‍රීරෝද රථ මක නිෂ්පාදන බද්ද රු. 60,000 වැඩි කරේ.

Page 1 of 2