March 28, 2024

ආනවිළුන්දාව අභයභූමියේ හානිය බරපතලයි - දේශපාලන හස්තයන්ට යට නොවී පරිසර හානිය නතර කරයි

රම්සා තෙත්බිම වන ආනවිළුන්දාව අභයභූමියේ පරිසර හානිය වහාම නතර කිරීමට කටයුතු කළ බව පරිසර අමාත්‍ය මහින්ද අමරවීර මහතා අද (28) පාර්ලිමේන්තුවේදී පැවසීය.

එම පරිසර හානිය පිළිබඳ අදාල නිලධාරීන්ගෙන් කරුණු විමසා පරිසර හානියක් සිදුව ඇත්නම් ඒ සඳහා අවශ්‍ය ක්‍රියාමාර්ග ගැනීමට උපදෙස් දුන් බවත් කුමන දේශපාලන බලපෑමක් ඒ පිටුපස සිටියත් පරිසර විනාශ කිරීමට ඉඩ නොදී නීතිය ක්‍රියාත්මක කරන බව අමාත්‍යවරයා සඳහන් කළේය.

මෙරට දෙවැනි රම්සා තෙත්බිම වන ආනවිළුන්දාව අභයභූමියේ කොටසක් ඩෝසර් කර ඉස්සන් කොටු ඇති කිරීම සඳහා කිසියම් පිරිසක් කටයුතු කරන බවට මාධ්‍ය අනාවරණය කළේය.

අභය භූමිය විනාශ කළ පුද්ගලයින්ට එරෙහිව අධිකරණ ක්‍රියාමාර්ග ගන්නා ලෙස තමන් පුත්තලම වනජීවි සහකාර අධ්‍යක්ෂවරයාට උපදෙස් ලබා දුන් බව වනජීවි අධ්‍යක්ෂ ජනරාල් චන්දන සූරියබණ්ඩාර මහතා පැවසීය.

1997 වසරේ ජූනි 11 වැනිදා අභය භූමියක් ලෙස නම් කර ඇති මෙම තෙත් බිම් අභයභූමිය හෙක්ටයාර 1397කින් සමන්විතය.

ප්‍රධාන වැව් පද්ධතියකින් ද සමන්විත මෙය තෙත්බිම් ආරක්ෂා කිරීමේ අන්තර්ජාතික සම්මුතිය හෙවත් රම්සා සම්මුතිය යටතේ 2001 වසරේ අගෝස්තු 03 වැනිදා රම්සා තෙත් බිමක් ලෙස ප්‍රකාශයට පත් කළේය. ඒ මෙරට දෙවැනි රම්සා තෙත් බිම ලෙසය.

මෙම වටිනා පරිසර පද්ධතිය ජලජ පක්ෂීන් දස දහස් ගනනකගේ ප්‍රජනන ස්ථානයක්, ක්ෂීරපායින් ඇතුළු තවත් සතුන් දහස් ගණනකගේ පෝෂණ සහ ලැගුම් ස්ථානයක්, දුලබ සමනල් විශේෂ ගණනාවක වාසස්ථානයක් මෙන්ම උඩවැඩියා සහ ලයිකන ඇතුළු වටිනා ශාක රාශියක නිජබිමක් ලෙස ද සුරක්ෂිත වී තිබේ.

දෙස් විදෙස් සංචාරකයින්ගේ ආකර්ෂණය දිනා ඇති මෙම අභය භූමියේ බටහිර මායිමට ආසන්න ප්‍රදේශයේ කඩොලාන පද්ධතිය පසුගිය කාලයේ විවිධ පාර්ශව විසින් විනාශ කර තිබුණි.

Rate this item
(0 votes)
Last modified on Friday, 28 August 2020 12:29