March 29, 2024

නිරෝධායන මධ්‍යස්ථානවල සිටින පුද්ගලයින්ට ඡන්දය නෑ

නිරෝධායන මධ්‍යස්ථානවල සිටින පුද්ගලයන්ට මෙවර ඡන්දය භාවිත කිරීමට අවස්ථාව ලබානොදෙන බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා පවසයි.

එහෙත් දින 14ක ස්වයං නිරෝධායනය අවසන් කළ පිරිස්වලට පස්වරු 4න් පසු තමන්ගේ ප්‍රවාහන ක්‍රමයක් භාවිත කර ඡන්දය ප්‍රකාශ කිරීමට පැමිණිය හැකි බව ඔහු පෙන්වා දෙයි.

කොවිඩ්-19 ආසාදිත තත්ත්වයෙන් සුවය ලබා රෝහලෙන් පිටත්ව ගොස් දින 14ක කාලයක් නිරෝධායනය වන ලෙස දන්වා ඇති පිරිස්වලටද ඡන්දය භාවිත කිරීමේ අවස්ථාව ලබාදෙන බව සෞඛ්‍ය සේවා අධ්‍යක්ෂ ජනරාල්වරයා සඳහන් කළේය.

විශේෂ තත්ත්වයන් යටතේ ඡන්දය ප්‍රකාශ කිරීම සඳහා පැමිණෙන්නන්ට අමතර කුටියක් සකස් කර ඇති අතර සෑම ඡන්ද මධ්‍යස්ථානයක්ම ආවරණය වන පරිදි සෞඛ්‍ය සේවා නිලධාරීන් යොදවා ඇති බව මැතිවරණ කොමිසම පැවසීය.

මැතිවරණ දිනය වන විට නිරෝධායන මධ්‍යස්ථානවල 800ක පමණ පිරිසක් රැඳී සිටින අතර ඔවුන්ගෙන් ඡන්දය හිමිව ඇත්තේ සියයට 50කට පමණ පිරිසකට වන බව  මැතිවරණ කොමිසම පෙන්වා දෙයි.

දින 14ක නිරෝධායනය අවසන් කළ පිරිස 1700ත් 1800ත් අතර පිරිසක් වේ.

නිවෙස්වල නිරෝධායනය සඳහා දැනට යොමු කර ඇත්තේ පොළොන්නරුව, ලංකාපුර ප්‍රදේශයේ නිවාස 190ත් 250ත් අතර පිරිසක් වන බව ද මැතිවරණ කොමිසම සදහන් කළේය.

Rate this item
(0 votes)