වරාය කටයුතු අමාත්‍ය ජොන්ස්ටන් ප්‍රනාන්දු මහතා ගෙදර යැවීමේ කටයුතු අද (25) සිට ආරම්භ කරන බව කොළඹ වරාය නැගෙනහිර පර්යන්තය සුරකීමේ එ්කා බද්ධ වෘත්තීය සමිති එකමුතුව ඊයේ (24) ජනාධිපති ලේකම් කාර්යාලය ඉදිරිපිට පැවැති විරෝධතාවයකදී ප්‍රකාශ කරන ලදී.
වැරදීමකින් හෝ ජොන්ස්ටන් ප්‍රනාන්දු මහතා වරාය භූමි පරිශ්‍රයට පැමිණියහොත් ඔහුව කුදලාගෙන ගොස් ගෙදරට දමන බවට එහිදී වෘත්තීය සමිති අනතුරු ඇඟවීමක් ද කරන ලදී.
කොළඹ වරායේ නැගෙනහිර පර්යන්තය ඉන්දියාවේ අදානි සමාගමට දිගු කාලීනව බදු දීම සඳහා වරාය කටයුතු අමාත්‍ය ජොන්ස්ටන් ප්‍රනාන්දු මහතා කැබිනට් පත්‍රිකාවක් ඉදිරිපත් කිරීම මෙම විරෝධයට හේතු වී තිබේ.
දෙවන බුවනෙකබාහු රාජ සභාව කඩා බිඳ දැමූ කුරුණෑගල නගරාධිපතිවරයාගේ මයිලකටවත් තමන් දිස්ත්‍රික් නායකයා සිටින තාක් කල් අත තැබීමට ඉඩ නොදෙන බවට ජොන්ස්ටන් ප්‍රනාන්දු මහතා කිහිප වතාවක්ම කර තිබෙන ප්‍රකාශයට පොදුජන පෙරමුණ පාර්ශවයෙන්ම ප්‍රතිවිරෝධතා එල්ල වෙමින් පවතින මොහොතක වරාය වෘත්තීය සමිතිවල විරෝධයද එල්ල වීම විශේෂත්වයකි.
