September 16, 2019

හම්බන්තොට වරායේ කසළ ගැන සැකයක්

හම්බන්තොට ජ්‍යාත්‍යන්තර වරායට පැමිණෙන නැව්වලින් ඉවත් කරනු ලබන කසළ හම්බන්තොට මහ නගර සභාවේ කසළ කළමනාකරණ ඒකකයට බැහැර කිරීම සිදුවන හෙයින්,  මේවා නැව් තුළ පරිහරණය කරන ඒවාද එසේත් නැතිනම් වෙනත් රටවලින් කසළ ගෙනවිත් නැව් මාර්ගයෙන් ඉවත් කරනවාද යන්න සැකයක් ඇතිවන හෙයින් නගර සභාවේ මන්ත්‍රීවරුන්ට මෙය නිවැරදි පැහැදිලි කරගැනීමක් මෙන්ම සියැසින්  දැක බලා ගැනීමටද අවශ්‍ය බව හම්බන්තොට මහ නගර සභාවේ විපක්ෂනායක ඩී.ඒ ගාමිණී මහතා (එ.ජා.ප) පැවසීය.

හම්බන්තොට මහ නගර සභාවේ මාසික සභා රැස්වීමේදී හෙතෙම මේ බව පවසා සිටියේය.

එහිදී ඒ මහතා මෙසේ අදහස් දැක්වීය.

"වෙනත් රටවලින් කසළ මෙරටට කන්ටේනර් පෙට්ටි පිටින් ගෙන්වා  කොළඹ වරායේ  ගබඩා කර තිබූ අවස්ථා පිළිබඳ පසුගිය කාලයේ වාර්තා වුණා. අපේ රටේ කසළ අපටත් කළමණාකරණය කිරීමට නොහැකි තත්ත්වයක් තුළ එසේ සිදු වූවා නම් හම්බන්තොට වරායට පැමිණෙන නැව්වලින් බැහැර කරනු ලබන කසළද නැව් වලින්ම ඉවත් කරන ඒවාද එසේ නැතිනම් වෙනත් රටකින් නැව් මගින් ගෙනවිත් කසළ බැහැර කරනවාද යන්න සාධාරණ  සැකයක් ඇතිවන හෙයින් මේ සඳහා වගකිව යුතු පාර්ශ්වයක  මැදිහත්වීම අවශ්‍යයි."

අනතුරුව අදහස් දැක්වූ හම්බන්තොට මහ නගර සභාවේ  වැඩබලන නගරාධිපති ගාමිණී ශ්‍රී ආනන්ද මහතා කියා සිටියේ සමුද්‍යාරක්ෂක  අධිකාරිය මගින් නිරීක්ෂණය කිරීමෙන් පසු නැව්වල ඇති කසළ පිටතට බැහැර කිරීම සිදුවන බවත්, වරායට පිටතින් පුද්ගලයන්ට ගොස් විමසීම් කිරීමට නොහැකි බවද  පැවසීය. නගර සභාවේ පරිසර කමිටුවට එම නිලධාරීන් ගෙන්වා දැනුවත් කිරීමට හැකි බවද නගරාධිපතිවරයා වැඩිදුරටත් සඳහන් කළේය. 

Rate this item
(0 votes)