September 20, 2019

එජනිස මහලේකම් පොහොට්ටුව - ගෝඨාභය සමඟ සාකච්ඡාවකට සැරසෙයි Featured

ජනාධිපතිවරණයට ඉදිරිපත් වීම සම්බන්ධයෙන් ශ්‍රී ලංකා පොදුජන පෙරමුණ සමග මෙන්ම ගෝඨාභය රාජපක්ෂ මහතා සමගද සාකච්ඡා කිරිමට බලාපොරොත්තු වන බව එක්සත් ජනතා නිදහස් සන්ධානයේ මහලේකම් පාර්ලිමේන්තු මන්ත‍්‍රී මහින්ද අමරවීර මහතා ඊයේ (22) පැවසීය.
 
ඔහු මේ බව පැවසූයේ ඩාර්ලි පාරේ පිහිටි ශ්‍රී ලංකා නිදහස් පක්ෂ මූලස්ථානයේදි පැවති මාධ්‍ය හමුවකදීය.
 
ඉතාමත් ඉක්මනින් දෙපාර්ශ්වය අතර සාකච්ඡා ආරම්භ වන බවද ගෝඨාභය රාජපක්ෂ මහතා ශ‍්‍රි ලංකා පොදුජන පෙරමුණේ අපේක්ෂකයා ලෙස ඉදිරිපත් කර තිබුණද ඔහු එම පක්ෂයේ සාමාජිකයෙක් නොවන නිසා ඔහු සමග වෙනම සාකච්ඡා කළ යුතුව ඇතැයිද අමරවිර මහතා එහිදි පැවසීය.
 
තම පක්ෂයේ අරමුණ පුද්ගලයෙක් දිනවිම නොව රටට පොදු ප‍්‍රතිපත්ති මාලාවක් හඳුන්වා දී එය ක‍්‍රියාවට නැගීම බවද ඔහු පැවසීය.එම ප‍්‍රතිපත්ති මාලාව මේ වන විට සකස් කර ඇති බවද ඔහු පැවසීය. 
 
ඇමති මණ්ඩලය තිහකට සීමා කිරීම,  මනාප ක‍්‍රමයක් නැති පක්ෂ තුළ එකිනෙකා මරාගන්නා තත්ත්වයක් ඇති නොකරණ, කුඩු කාරයින්ට හා ජාවාරම්කාරයින්ට ඉදිරිපත් වීමට ඉඩක් නොලැබෙන නව මැතිවරණ ක‍්‍රමයක් සකස් කිරිම, ජාතික ආර්ථිකයක් ගොඩ නැගීම, අත්‍යවශ්‍ය ආහාර හා අනෙකුත් කාර්මික නිෂ්පාදන මෙරටදීම නිෂ්පාදනය කිරිමට ක‍්‍රමවේදයක් සැකසීම, විදේශ ණයෙන් ක‍්‍රමානුකුළව මිදෙන ආර්ථික ක‍්‍රියාවලියක් ඇති කිරිම, මෙම ප‍්‍රතිපත්ති මාලාවට ඇතුළත් වන බවද අමරවීර මහතා පැවසීය.

Rate this item
(0 votes)