August 24, 2019

තවුහිද් ජමාත් කල්ලියේ තවත් 5 ක් හොරොව්පොතානෙන් අල්ලයි

සහරාන් හසීම් නමැත්තා හා තව්හීත් ජමාත් සංවිධානය සමඟ සමීප සබඳතා පවත්වමින් දිස්ත්‍රික්ක දෙකක අන්තවාදී දේශන සිදුකළ සංවර්ධන සහකාරවරයකු ඇතුළු සැකකරුවන් පස්දෙනෙකු හොරොව්පොතාන කිවුලේකඩ සහ කැබිතිගොල්ලෑව ඇල්ලැව යන ප්‍රදේශවලදී අද (24) අත්අඩංගුවට ගත් බව හොරොව්පොතාන පොලිසිය කියයි.

ස්ථානාධිපති පොලිස් පරීක්ෂක රොෂාන් සංජීව මහතාට ලැබුණු තොරතුරක් අනුව මෙලෙස අත්අඩංගුවට ගනු ලැබුවේ හොරොව්පොතාන ප්‍රාදේශීය ලේකම් කාර්යාලයට අනුයුක්තව සේවය කරන  හොරොව්පොතාන කිවුලේකඩ පදිංචිකරුවෙකු සහ කැබිතිගොල්ලෑව ඇල්ලැව ප්‍රදේශවල පදිංචි සැකකරුවන් පස් දෙනෙකි.

පොලීසිය පවසන්නේ මොවුන් අනුරාධපුර සහ ත්‍රිකුණාමලය දිස්ත්‍රික්කවල පිහිටි විවිධ ස්ථානවල අන්තවාදී දේශන සිදු සිදුකර ඇති බව ය. ඊට අමතරව ත්‍රස්තවාදී ප්‍රහාරයට සම්බන්ධ දැනට විදේශ ගතව සිටින ප්‍රධාන සැකකරුවකු සමඟ ද මෙම සැකකරුවන් සමීප සබඳතා පවත්වා ඇති අතර ඔහුගෙන් ලක්ෂ ගණනින් මුදල් ලබා ගෙන ඇති බවටත් පොලිසිය වැඩිදුරටත් තොරතුරු අනාවරණය කරගෙන තිබේ.

අත්අඩංගුවට ගත් සැකකරුවන් හෙට (25) කැබිතිගොල්ලෑව මහෙස්ත්‍රාත් අධිකරණයට ඉදිරිපත් කිරීමෙන් පසු පැය 72 ක් රඳවා ප්‍රශ්න කිරීමට අවසර ලබා ගැනීමට නියමිතය.

Rate this item
(0 votes)