July 23, 2017

හම්බන්තොට වරාය සම්බන්ධ ගිවිසුම මෙම මස අග වන විට අත්සන් තබන බව අගමැති රනිල් වික්‍රමසිංහ මහතා පවසයි.

අගමැතිවරයා මේ බව පැවසූවේ බියගම ආසනයේ එක්සත් ජාතික පක්ෂ බල මණ්ඩල පාක්ෂකයින් අමතමිනි.

මත්තල ගුවන්තොටුපල ද මෙම වසර අග වන විට නව මුහුණුවරකින් ක්‍රියාත්මක කරන බව අගමැතිවරයා පෙන්වා දෙයි.

මේ අතර ලංකා ප්‍රදර්ශන හා සම්මේලන මධ්‍යස්ථානයේ පැවැති ලංකා ලයිව්ස්ටොක් 17 ජාත්‍යන්තර ව්‍යාපාරික ප්‍රදර්ශනයෙහි සමාරම්භක උත්සවයට සහභාගි වෙමින් අගමැතිවරයා සදහන් කළේ පශු සම්පත් හා ගොවිපළ නිෂ්පාදන ඉහළ නැංවීම සඳහා අවශ්‍ය කර්මාන්ත හා ආයෝජනයන්ට අදාළ ගිවිසුම් මේ මස අවසානයේදි අත්සන් කරන බවයි.

අදාළ ගිවිසුම් අත්සන් කිරීමෙන් පසුව පශු සම්පත් හා ගොවිපළ නිෂ්පාදනවලට අවශ්‍ය රැකවරණය හා ප්‍රවර්ධනය ඉහළ නැංවෙන බවත් මෙරට සංවර්ධන කටයුතුවලට එමඟින් විශාල දායකත්වයක් ලැබෙනු ඇති බවත් අගමැතිවරයා ප්‍රකාශ කළේය. 

මේ දිනවල පවතින දැඩි නියං තත්ත්වය හේතුවෙන් විල්පත්තුව ජාතික වනෝද්‍යානය දින නියමයක් නොමැතිව වසා දමන බව වනජීවී සංරක්ෂණ දෙපාර්තුමේන්තුව පවසයි.

අගෝස්තු මාසයේ  පාසල් සිසුන් ඇතුළු බොහෝ සංචාරක පිරිස් මෙම වනෝද්‍යානය නැරඹීමට පැමිණෙන මුත් පවත්නා නියං තත්ත්වය ය‍ටතේ වනෝද්‍යානය විවෘත කළ නොහැකි අතර  අක්කර ලක්ෂ 3කටත් වඩා අතිවිශාල ප්‍රදේශයක් පුරා පැතිර ගත් මෙම උද්‍යානයේ වෙසෙන වන සතුන්ට බාහිරින් ජලය සපයා දීමට පවා කටයුතු යෙදෙන බව වාර්තා වේ.

ශ්‍රී ලංකා යුද හමුදාවේ මාණ්ඩලික ප්‍රධානී ලෙස මේජර් ජෙනරාල් කේ. ඒ. ඩී. අමල් කරුණාසේකර පත්කර තිබේ.

ඔහු 1981 වසරේ කැඩෙට්  නිලධාරියෙකු ලෙස ශ්‍රී ලංකා යුද හමුදාවට එක්විය.

අනතුරුව අමල් කරුණාසේකර දියතලාව ආරක්ෂක විද්‍යාලයෙන් සිය පුහුණුව නිමාකර දෙවන ලුතිනන්වරයෙකු ලෙස අධිකාරියට පත්වුයේ 1984 වසරේදීය.

මේජර් ජෙනරාල් අමල් කරුණාසේකර එල්. ටී. ටී. ඊ ත්‍රස්තවාදීන්ට එරෙහි මානුෂීය මෙහෙයුමේදී තීරණාත්මක කාර්ය භාරයක් ඉටුකළ නිලධාරියෙකු ලෙස කටයුතු කලේය.

පසුව ඔහු යුධ හමුදා බුද්ධි අංශ ප්‍රධානියා ලෙස ද කටයුතු කර ඇති අතර මේජර් ජෙනරාල් කේ. ඒ. ඩී. අමල් කරුණාසේකර කිලිනොච්චිය ප්‍රදේශය භාර ආඥාපතිවරයා ලෙස කටයුතු කලේය.

යුද හමුදා මාණ්ඩලික ප්‍රධානියා ලෙස මීට පෙර කටයුතු කළේ වත්මන් යුද හමුදාපති ලුතිතන් ජෙනරාල් මහේෂ් සේනානායකයි.

ආණ්ඩුවක් පෙරලාදැමිය හැක්කේ ප්‍රජාතන්ත්‍රවාදී ක්‍රමවේදයක් තුළ පමණක් බව දකුණු පළාත් ප්‍රධාන අමාත්‍ය ශාන් විජේලාල් මහතා පවසයි.

ඔහු මේ බව පැවසූවේ ගාල්ල ප්‍රදේශයේදී කැඳවා තිබූ මාධ්‍ය හමුවකදී මාධ්‍යවේදියෙකු නැගූ ප්‍රශ්නයකට පිළිතුරු ලබාදෙමිනි.

ජනතාව විසින් ආණ්ඩුවේ පැවැත්ම සම්බන්ධයෙන් තීරණ ගනු ඇති බවත් ආණ්ඩුක්‍රම ව්‍යවස්ථාවේ වෙනසක් ඇති කිරීමට බලය ලබාදී ඇත්තේ වත්මන් ජනාධිපතිවරයාට බවත් ප්‍රධාන අමාත්‍යවරයා වැඩිදුරටත් පැවසී ය.

වෛද්‍ය පීඨ ශිෂ්‍ය ක්‍රියාකාරී කමිටුවේ කැදවුම්කරු ලෙස කටයුතු කරන රයන් ජයලත් අත්අඩංගුවට ගැනීමට යාමේ සිද්ධිය සහ එම අවස්ථාවේ පොලීසිය විසින් අනුගමනය කළ ක්‍රමවේදය පිළිබඳ නීතිය, සාමය සහ දක්ෂිණ සංවර්ධන අමාත්‍ය සාගල රත්නායක මහතා වාර්තාවක් කැඳවා තිබේ.

ඒ අනුව ඒ පිළිබඳව පරීක්ෂණයක් සිදු කර වාර්තාවක් ලබා දෙන ලෙස තමන් මේ වන විටත් පොලිස්පති පූජිත් ජයසුන්දර මහතාට නියෝග කර ඇති බව අමාත්‍ය සාගල රත්නායක මහතා ප්‍රකාශ කරයි.
නිවේදනයක් නිකුත් කරමින් නීතිය, සාමය  සහ දක්ෂිණ සංවර්ධන අමාත්‍ය සාගල රත්නායක මහතා මේ බව ප්‍රකාශ කර තිබේ.

එම නිවේදනය පහත පහතින් දැක්වේ,

2017.07.22
ප්‍රවෘත්ති නිවේදනය

2017.06.21 වන දින සෞඛ්‍ය අමාත්‍යංශයේ ගොඩනැගිල්ලට බලහත්කාරයෙන් ඇතුළු වී පොදු දේපල වලට හානි කිරීමට අදාළව, පොදු දේපල පනත යටතේ මාලිගාකන්ද මහේස්ත්‍රාත් අධිකරණයේ නඩු අංක බී/16250/17 දරණ නඩුවේ අත්අඩංගුවට ගැනීමට අවශ්‍ය සැකකරුවෙකු මෙන්ම කොටුව ම.උ.නඩු අංක  B 3049/16 දරණ නඩුවේ වරෙන්තු නිකුත් වී සිටින සැකකරුවෙකු වන වෛද්‍ය පීඨ ශිෂ්‍ය ක්‍රියාකාරී කමිටුවේ කැදවුම්කරු වන රයන් ජයලත් ශිෂ්‍යා 2017.07.20 වන දින අත්අඩංගුවට ගැනීමට යාමේ සිද්ධිය පිළිබඳව සහ එම අවස්ථාවේදී පොලීසිය විසින් අනුගමනය කළ ක්‍රමවේදයන් පිළිබඳව පරීක්ෂණයක් සිදුකර වහාම මා වෙත වාර්තාවක් ලබා දෙන ලෙස පොලිස්පති පූජිත් ජයසුන්දර මහතාට මේ වනවිටත් මා නියෝග කර තිබෙනවා.

මේ සතියේ පාර්ලිමේන්තුව රැස්වූ පසුව මෙම සිද්ධිය සම්බන්ධයෙන් අමාත්‍යවරුන්ගේ නිවේදන අවස්ථාවේ විශේෂ ප්‍රකාශයක් කිරීමටද බලාපොරොත්තු වෙමි.

සාගල රත්නායක (පා.ම)
නීතිය හා සාමය සහ දක්ෂිණ සංවර්ධන අමාත්‍ය

ඩෙංගු රෝගීන් පෞද්ගලික රෝහල්වලින් සිදු කරන පුර්ණ රුධිර පරීක්ෂණ වාර්තාව පැය 2 ක් ඇතුළත නිකුත් කිරීමට නොහැකි වුවහොත් ප්‍රතිකාර කිරීමට එය වලංගු නොවන බව සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා පවසයි.

අමාත්‍යවරයා මේ බව ප්‍රකාශ කළේ ඊයේ (21) සෞඛ්‍ය අමාත්‍යාංශයේ ආයතන ප්‍රධානීන්ගේ රැස්වීමට එක්වෙමිනි.

ඇතැම් පෞද්ගලික රෝහල් පුර්ණ රුධිර පරීක්ෂණ වාර්තා නිකුත් කිරීමට පැය 02 කට වැඩි කාලයක් ගන්නා බවට වෛද්‍යවරුන්ගෙන් ලැබුණ පැමිණිලි මත අවධානය යොමු කරමින් සෞඛ්‍ය අමාත්‍යවරයා මේ බව කියා සිටියේය.

වාර්තා ප්‍රමාද වීම නිසා ප්‍රතිකාර කිරීමේ ගැටළු මතුවන බව වෛද්‍යවරුන් පෙන්වා දී ඇති අතර එම නිසා පෞද්ගලික රෝහල්වලින් පුර්ණ රුධිර පරීක්ෂණ වාර්තා පැය 02 කට පෙර නොලැබෙන්නේ නම් රජයේ රෝහලකට පැමිණ නොමිලේ පරීක්ෂණ කටයුතු සිදු කර ගන්නා ලෙස අමාත්‍යවරයා ජනතාවගෙන් ඉල්ලා සිටින බව සඳහන් වේ.

රජයේ රෝහල්වල පැයක් තුළ පුර්ණ රුධිර පරීක්ෂණ වාර්තා ලබා දෙන අතර කොළඹ ජාතික රෝහලේ ව්නාඩි 10 කින් රුධිර පරීක්ෂණ වාර්තාවක් නිකුත් කරන බවද අමාත්‍යවරයා පැවසීය.

මේ අතර ඩෙංගු රෝගය පාලනය කිරීම සදහා දිවයින පුරා පිහිටි වරායවල ඉවත් කරන ලද බෝට්ටු ව්නාශ කිරීම පිළිබදව ද මෙහිදී අවධානය යොමු වී ඇති අතර ඒ අනුව සෞඛ්‍ය අමාත්‍යවරයා සහ ධීවර සහ ජලජ සම්පත් අමාත්‍යවරයා දුරකථනයෙන් සාකච්ඡා කර ඒ සදහා ව්ශේෂ වැඩපිළිවෙලක් ක්‍රියාත්මක කරන ලද බවද සඳහන් වේ.

තව ද දිවයින පුරා සියළුම පාසල්වල ඩෙංගු මදුරු මර්දන වැඩසටහන් සහ රාජ්‍ය ආයතනවල ඩෙංගු මදුරු මර්දන වැඩසටහන් ක්‍රියාත්මක කිරීම පිළිබදව ද මෙහිදී සාකචිඡා කෙරුන අතර ඒ මහතා අමාත්‍ය අකිල ව්රාජ් කාරියවසම් මහතා සමග දුරකථනයෙන් මේ පිළිබද සාකචිඡා කළ අතර එහිදී මීළග සිකුරාදා සියළුම පාසල්වලට නිවාඩු ලබා දී පාසල් පිරිසිදු කිරීමේ දීප ව්‍යාප්ත වැඩපිළීවෙලක් දියත් කිරීමට තීරණය  කරනු ලැබීය.එමෙන්ම ලබන සෙනසුරාදා සහ ඉරිදා දිනවල සියළුම රාජ්‍ය ආයතන පිරිසිදු කිරීමට ද නියමිත බව වැඩිදුරටත් සඳහන් වේ.

 

 

පසුගිය බදාදා රැස්වූ කැබිනට් අනුකාරක කමිටුව විසින් කොළඹ නගරයේ කැලි කසළ විධිමත්ව හා කාර්යක්‍ෂමව ඉවත් කිරීම හේතුවෙන් කොළඹ නගර ආශ‍්‍රිතව පවතින අපවිත‍්‍ර ඇලමාර්ග පවිත‍්‍ර කිරීමේ බලයත් මහානගර හා බස්නාහිර සංවර්ධන අමාත්‍ය පාඨලී චම්පික රණවක මහතාට පවරා ඇත.

ඒ අනුව එම පවිත‍්‍රකිරීමේ කටයුතු අදාල සියලූ ආයතන සමග සම්බන්ධ වී හෙට දින (22) සිට ආරම්භ කිරීමට කටයුතු කරන බව ඇමති චම්පික රණවක මහතා පවසයි.

එසේම, පසුගිය ජූලි 05 වැනිදා සිට කොළඹ නගරයේ කැලි කසළ කළමනාකරණය පිළිබඳ වගකීම ඇමති පාඨලී චම්පික රණවක මහතාට භාර කිරීමෙන් පසු අඛණ්ඩ මෙහෙයුමක්, අධීක්‍ෂණයක් සහ ප‍්‍රගති සමාලෝචනයක් සිදු කෙරිණි. 2017 ජූලි 20 වන විට මහමගට නීති විරෝධී අන්දමින් කැලි කසළ බැහැර කරන්නන් 754 දෙනෙකු අත්අඩංගුවට ගෙන ඇත. සතියේ සෑම දිනකම රාත‍්‍රී 7.00 ට කොළඹ මහා නගර සභා ශාලාවේදී දෛනික සමාලෝචනය සිදුකරන අතර ඒ සඳහා කොළඹ, මොරටුව, කෝට්ටේ, දෙහිවල-ගල්කිස්ස, කැළණිය හා කඩුවෙල නාගරික කොමසාරිස්වරු ඇතුලූ අදාල නගර සභා බල ප‍්‍රදේශයන්හි පොලිස් ස්ථානාධිපතිවරු, ඉංජිනේරුවන්, මහජන සෞඛ්‍ය පරීක්‍ෂකවරු සහ කැලි කසළ එක්රැස් කරන ආයතන වන අබාන්ස් හා කෙයා ක්ලීනින් යන ආයතන වල නිලධාරීන් ද මෙම සාකච්ඡාවට එක්වේ.

උදෑසන 4.00-6.00 අතර කාලයේ කොළඹ නගරයේ අලංකරණය කිරීමේ හමුදා ඒකකය විසින් ඒ ඒ අදාල ප‍්‍රදේශවල කැලි කසල එක්රැස්වන ප‍්‍රදේශ හා කැලි කසල ගොඩ වේ යැයි අවධානමක් සහිත ප‍්‍රදේශ ඡායාරූප ගත කෙරේ. ඉන් අනතුරුව නැවත සවස 3.00ත් 5.00 ත් අතර කාලයේදී එම නිලධාරීන්ම ඡායාරූප ගත කරයි. එම කාලය තුළ පරිසර පොලිස් කණ්ඩායම් සහ නගර සභා හා පෞද්ගලික කැලි කසළ එකතු කරන කණ්ඩායම් තමන්ට පැවරී ඇති රාජකාරී ඉටුකර ඇත්ද නැද්ද යන්න එදිනම රාත‍්‍රීයේ පැවැත්වෙන විමර්ශනය කිරීම අමාත්‍යවරයාගේ මූලිකත්වයෙන් සිදු කෙරේ.

ලබාගෙන ඇති සියලූම ඡායාරූප සංසන්දනාත්මක වශයෙන් එම්.එම්.එස්. ආශ‍්‍රයෙන් අදාල නිලධාරීන්ට යොමු කරන අතර, ඒ අනුව කැලි කසළ එකතු කිරීම හා අදාල රාජකාරී මෙහෙයුම් සිදු කෙරේ. දිනපතා පැවැත්වෙන රාත‍්‍රී 7.00 ප‍්‍රගති විශ්ලේෂණයේදී ඒ ඒ කාරණා සම්බන්ධයෙන් අධීක්‍ෂණය කෙරෙන අතර කැලි කසළ එකතු කිරීම සම්බන්ධයෙන් පෞද්ගලික ආයතන නිසි වගකීම ඉටුකර නොමැති නම් ඊට දඩ මුදලක්ද නියම කෙරේ.

කොළඹ නගරය ආශ‍්‍රිතව පමණක් ආරම්භ කළ කැලි කසළ විසඳීමේ මෙහෙයුම අද වන විට කෝට්ටේ, කඩුවෙල, කැළණිය, දෙහිවල-ගල්කිස්ස, මොරටුව යන නාගරික බල ප‍්‍රදේශයන්හි ක‍්‍රියාත්මක කිරීමට ද කටයුතු කර ඇත.
දෛනික විමර්ෂණයක් සහිතව අඛණ්ඩව කරගෙන යෑමට අමාත්‍ය පාඨලී චම්පික රණවක මහතා පියවර ගෙන ඇත. මේ වන විට කොළඹ නගරයේ දෛනිකව ගොඩගැසෙන කසළ පමණක් ඇති අතර අඛණ්ඩව ගොඩගැසී තිබූ කසළ මේ වන විට සම්පූර්ණයෙන්ම ඉවත් කිරීමට ද පියවර ගෙන තිබේ.

පාසල් අධ්‍යාපන කාලය වසරකින් අඩු කිරීමට ජාතික අධ්‍යාපන කොමිෂන් සභාව විසින් යෝජනාවක් ඉදිරිපත් කර ඇත.

එම යෝජනාවට අනුව සාමාන්‍ය පෙළ විභාගය 10 වසරේ දී සහ උසස්‌ පෙළ විභාගය 12 වසරේ දී පැවැත්වීමට නිර්දේශ කර ඇත.

මීට අමතරව කොමිෂන් සභාව යෝජනා කර ඇත්තේ පාසල් යාමට පෙර සියලු දරුවන් රජයේ පාලනය යටතේ ස්‌ථාපිත කෙරෙන පෙර පාසල් සඳහා ඇතුළත් කර එකම විෂය නිර්දේශයක්‌ ඒවායේ ක්‍රියාත්මක කළ යුතු බවයි.

එක ශ්‍රේණියේ සිට පහ ශ්‍රේණිය දක්‌වා ප්‍රාථමික අංශය ලෙසද දැනට හය ශ්‍රේණියේ සිට නව වැනි ශ්‍රේණිය දක්‌වා පවතින කනිෂ්ඨ ද්විතියික අංශය හය ශ්‍රේණිය සිට අට ශ්‍රේණිය ලෙසද වර්ග කිරීමට කොමිෂන් සභාව යෝජනා කර ඇති අතර නවය ශ්‍රේණියේ සිට දොළහ ශ්‍රේණිය දක්‌වා වන සිව් වසර ජ්‍යෙෂ්ඨ ද්විතියික අංශය ලෙසද වර්ග කිරීමකට ලක්‌කර ඇත.

මීට අමතරව කොමිෂන් සභාව යෝජනා කර ඇත්තේ සිව් වසර සම්පූර්ණ වන දරුවන් රජයේ පාලනය යටතේ ස්‌ථාපිත කෙරෙන පෙර පාසල් සඳහා ඇතුළත් කර එකම විෂය නිර්දේශයක්‌ ඒවායේ ක්‍රියාත්මක කළ යුතු බවය.

සාමාන්‍ය අධ්‍යාපනය පිළිබඳ ජාතික ප්‍රතිපත්තිය සඳහා සකස්‌ කරන ලද යෝජනාවලියේ ඉහත යෝජනාව අන්තර්ගත වන අතර එම යෝජනාවලිය මේ වන විට ජනාධිපති මෛත්‍රිපාල සිරිසේන මහතාට සහ අගමැති රනිල් වික්‍රමසිංහ මහතාට භාරදී තිබේ.

අධ්‍යාපන අමාත්‍යංශය සඳහන් කළේ මෙම යෝජනා ජනපති, අගමැති හා අධ්‍යාපන ඇමැතිවරයාගේ මැදිහත්වීමකින් පසු සාකච්ඡාවට ලක් කර ක්‍රියාත්මක කිරීම සම්බන්ධයෙන් තීරණයක් ගනු ඇති බවයි.

ශ්‍රී ලාංකීය ජනගහනයෙන් සියයට 31 ක්‌ පිළිකා කාරකයක්‌වන දුම් රහිත දුම්කොළ භාවිතයට ඇබ්බැහි වී ඇති බව දුම්කොළ හා මද්‍යසාර පිළිබඳ ජාතික අධිකාරිය පවසයි.

මෙම සංඛ්‍යාවෙන් සියයට 26 ක්‌ පිරිමින් වන අතර සියයට 5 ක්‌ කාන්තාවෝ වෙති.

මෙරට ලියාපදිංචි වී ඇති පිළිකා රෝගීන්ගෙන් සියයට 14.3 ක්‌ මුඛ පිළිකා රෝගීන්වන අතර එම තත්ත්වයට ප්‍රධානතම හේතුව වී ඇත්තේ දුම් රහිත දුම්කොළ භාවිතය බව පිළිකා රෝග විශේෂඥ වෛද්‍ය හේමන්ත අමරසිංහ මහතා පැවසීය.

මුඛ පිළිකා හේතුවෙන් දිනකට මරණ 3 කට අධික සංඛ්‍යාවක්‌ බැගින් වාර්ෂිකව 1000 කට අධික සංඛ්‍යාවක්‌ මිය යන අතර වාර්ෂිකව එම රෝගීන් 2400 ක්‌ පමණ පිළිකා රෝහල්වලට වාර්තාවන බව අනාවරණය වී ඇතැයි ඔහු වැඩිදුරටත් පැවසීය.

ලෝක සෞඛ්‍ය සංවිධානය මඟින් පළමුවැනි කාණ්‌ඩයේ පිළිකා කාරකයන් ලෙස වර්ගීකරණය කර ඇති දුම් රහිත දුම්කොළ නිෂ්පාදන වශයෙන් බුලත් විට සඳහා යොදා ගන්නා බුලත්, පුවක්‌, දුම්කොළ හා හුණු මෙන්ම වාණිජමය වශයෙන් සකස්‌ කරනු ලබන මාවා, ගුට්‌කා, පාම්පරාග්, හාන්ස්‌, බාබුල් හා බීඩි ගැනේ.
 

ප්‍රශ්නගත බැදුම්කර නිකුත් කිරීමේ සිද්ධියට අදාළ පැමිණිල්ලේ සාක්ෂි ඉදිරි සති දෙක තුළ අවසන් කිරීමට නියමිත බව එම කොමිසමේ සභාපති විනිසුරු කේ.ටී.චිත්‍රසිරි ඊයේ (20) කොමිසමට දැනුම් දී තිබේ.

පැමිණිල්ලේ සාක්ෂි අවසන් කිරීමෙන් අනතුරුව ලබන මස මුලදී ප්‍රශ්නගත බැඳුම්කර ගනුදෙනුව සම්බන්ධයෙන් නම් සඳහන් වූ පර්පවුවල් ට්‍රෙෂරීස් සමගම වෙනුවෙන් සාක්ෂි ආරම්භ කරන බව සභාපතිවරයා වැඩිදුරටත් පැවසීය.

මේ අතර ඉදිරි දිනකදී විශ්මයට පත්වන ආකාරයේ සාක්ෂිකරුවෙකු බැඳුම්කර කොමිසමට ඉදිරිපත් කිරීමට කටයුතු කරන බව පැමිණිලි වෙනුවෙන් පෙනී සිටි රජයේ නීතිඥ ආචාර්ය අවන්ති පෙරේරා බැඳුම්කර කොමිසමට ඊයේ දැනුම් දී ඇත.

දැනටමත් එම පුද්ගලයාගෙන් ප්‍රකාශ සටහන් කර ගනිමින් සිටින බව කොමිසමට දැනුම් දී ඇත.

Page 1 of 1518