January 24, 2018

තමන්ට එරෙහිව අපහාසාත්මක ප්‍රකාශයක් සිදුකිරීම හේතුවෙන් හිටපු අමාත්‍ය ජොන්ස්ටන් ප්‍රනාන්දු මහතාගෙන් සහ එම අපහාසාත්මක ප්‍රකාශය විකාශය කළ දෙරණ රූපවාහිනී නාලිකාවෙන් රුපියල් මිලියන 500 බැගින් මිලියන 1000ක් වන්දි ඉල්ලා ජනතා විමුක්ති පෙරමුණ නායක අනුර කුමාර දිසානායක මහතා අද (23) කොළඹ දිසා අධිකරණය හමුවේ අපහාස නඩුවක් ගොනු කර තිබේ.

තම කීර්තිනාමයට අපහාස වන අන්දමින් වගඋත්තරකාර හිටපු අමාත්‍යවරයා දිගින් දිගටම කටයුතු කරන බවද ජනතා විමුක්ති පෙරමුණ නායකවරයා නඩුව ගොනු කරමින් කියා සිටී.

නීතිඥ සුනිල් වටගල මහතා මාර්ගයෙන් මෙම පැමිණිල්ල ගොනු කර ඇත.

හෙට උදෑසන 11.30 සිට සවස 1.00 දක්වා කාලය තුළ කටුනායක ගුවන් තොටුපලේ සිට අධිවේගී මාර්ගය ඔස්සේ පෑලියගොඩ, බණ්ඩාරනායක මාවත, ඔරුගොඩවත්ත හංදිය, දෙමටගොඩ, බොරැල්ල හංදිය, ඩි.එස් හංදිය, ශ්‍රින්පාර්ක්, නෙළුම් පොකුණ හංදිය, පුස්තකාල වටරවුම, ලිබර්ටි වටරවුම, සෙන් මයිකල් පාර ඔස්සේ ගාලු පාර දක්වා මාර්ගය ඉන්දුනීසියානු ජනාධිපතිපතිවරයා ශ්‍රී ලංකාවට පැමිණීම හේතුවෙන් වසා තැබෙන බව පොලීසිය පවසයි.

එමෙන්ම සිංගප්පූරු අගමැතිවරයා ශ්‍රී ලංකාවෙන් පිටවීම හේතුවෙන් සවස 1.00 සිට සවස 2.00 දක්වා කාලය තුළ කොල්ලුපිටිය හංදිය, පිත්තල හංදිය, පුස්තකාල වටරවුම, නෙළුම් පොකුණ හංදිය, ශ්‍රින්පාර්ක්, ඩි.එස් හංදිය, බොරැල්ල හංදිය, දෙමටගොඩ, ඔරුගොඩවත්ත හංදිය, බණ්ඩාරනායක වටරවුම, පෑලියගොඩ අධිවේගී මාර්ගයෙන් කටුනායක ගුවන් තොටුපළ දක්වා වූ මාර්ගය වසා තැබේ.

අදාළ කාලය තුළ කොළඹ සිට කටුනායක ගුවන්තොටුපළ දක්වා මාර්ගවල වාහන ගමනාගමනය සිමා කර ඇති බැවින් ඒ සඳහා විකල්ප මාර්ග භාවිත කරන ලෙස පොලීසිය දැනුම් දී ඇත.

දෙරට අතර වෙළෙඳ කටයුතු සීග‍්‍රයෙන් ඉදිරියට ගෙන යාමේ නිදහස් වෙළෙඳ ගිවිසුමකට ද නායක දෙපළ ඉදිරියේ අත්සන් තැබුණු අතර ශ්‍රී ලංකාව වෙනුවෙන් සංවර්ධන උපායමාර්ග හා ජාත්‍යන්තර වෙළෙඳ අමාත්‍ය මලික් සමරවික‍්‍රම මහතා සහ සිංගප්පූරු රජය වෙනුවෙන් එරට වෙළෙඳ හා කර්මාන්ත අමාත්‍ය එස්. ඊෂ්වරන් මහතා ඊට අත්සන් තැබූහ.

සිංගප්පූරුව සහ ශ්‍රී ලංකාව අතර ආර්ථික, වෙළෙඳ සහ ආයෝජන සහයෝගීතාව ඉදිරියේදී තවදුරටත් වර්ධනය කර ගැනීමට කටයුතු කරන බව සිංගප්පූරු අග‍්‍රාමාත්‍ය ලී ෂියෑන් ලූන් මහතා පවසයි.

නිල සංචාරක් සඳහා දිවයිනට පැමිණ සිටින සිංගප්පූරු අග‍්‍රාමාත්‍යවරයා අද (23) පෙරවරුවේ ජනාධිපති කාර්යාලයේදී ජනාධිපති මෛත්‍රීපාල සිරිසේන මහතා හමු වූ අවස්ථාවේදී මේ බව කියා සිටියේය.

දෙරට අතර ආර්ථික, වෙළෙඳ සහ ආයෝජන සහයෝගීතාවය වර්ධනය කර ගැනීම පිළිබඳව මෙහිදී නායකයින් දීර්ඝ වශයෙන් සාකච්ජා කළහ.

මෙහිදී අදහස් දැක්වූ සිංගප්පූරු අග‍්‍රාමාත්‍යවරයා ප‍්‍රකාශ කළේ දෙරට අතර අත්සන් තැබුණු මෙම නව ගිවිසුම මගින් වෙළෙඳ සහ ආයෝජන ක්ෂේත‍්‍ර තුළ දෙරටටම ප‍්‍රතිලාභ සැලසෙන නව අවස්ථා රැසක් ඉදිරියේදී නිර්මාණය වනු ඇති බවයි.

වෘත්තීය පුහුණු, නව රැකියා අවස්ථා සහ යටිතල පහසුකම් සංවර්ධන ක්ෂේත‍්‍ර සඳහා සිංගප්පූරුවෙන් ශ්‍රී ලංකාවට ලබා දෙන සහය ඉදිරියේදී තවදුරටත් ව්‍යාප්ත කිරීමට කටයුතු කරන බව ද මෙහිදී අග‍්‍රාමාත්‍යවරයා සඳහන් කළේය.

එමෙන්ම ශ්‍රී ලංකාවේ සුළු හා මධ්‍ය පරිමාණ ව්‍යාපාරයන්ට අදාළ ආයෝජන අවස්ථා විශාල වශයෙන් වර්ධනය වී ඇති අතර ඒ සඳහා සිංගප්පුරුවේ ආයෝජකයින් තවදුරටත් දිරිමත් කරන ලෙස ජනාධිපතිවරයා කළ ඉල්ලීමට ප‍්‍රතිචාර දැක්වූ අග‍්‍රාමාත්‍යවරයා ඒ පිළිබඳ එළැඹෙන ව්‍යාපාරික හමුවලදී විශේෂ අවධානයක් යොමුකර කටයුතු කරන බව සඳහන් කළේය.

 

අවුරුදු 70ක් තුවාලේ වැඩි කරපු එවුන් පන්නන්න ඕනේ බව ජනතා විමුක්ති පෙරෙමුණේ ඌව පළාත් සභා මන්ත්‍රී සමන්ත විද්‍යාරත්න මහතා පවසයි.

ඒ ඊයේ (22) පැවති ජන හමුවකට එක්වෙමිනි.

එහිදී ඒ මහතා මෙසේ අදහස් දැක්වීය.

“දුප්පතාගේ දුක තේරෙන්නේ දුප්පත් එකෙකුට. ගොවියාගේ අමාරුව තේරෙන්නේ ගොවිතැන් කරපු එකෙකුට. මෙතුවක් කල් මේ රටේ ජනතාව තුවාලේ තියෙන මිනිස්සු. තුවාල නැති අනුරලට, ලක්ෂ්මන්ලට, හරින්ලට, නිමල්ලට, ඩිලාන්ලට, මෛත්‍රිලට, රනිල්ලට, මහින්දලට ඡන්දේ දුන්නා. උන් මොකද කළේ කවදාවත් කරගැටයක් මතු වෙච්ච නැති අත්වලින් කතිරේ ගැහුවා කරගැට මතු වෙච්ච මිනිස්සු. උන් මොකද කළේ උන් ගියා. අපේ තුවාල වලට බෙහෙත් දැම්මා. ප්‍රතිපත්ති ගෙනාවා. වැඩපිළිවෙල ගෙනාවා. තුවාලේ වණයක් වුණා. දැන් වේදනාව වැඩි. ඕජස් ගලනවා. අමාරුව ඇවිල්ලා. 70 වසරක් කුණු වෙච්ච තුවාලේ දැන්වත් අපට භාර දෙන්න. ඒක ගොඩ ගන්නම්. තුවාල ඇති මිනිස්සු අපි.”

“අපි මේ අත් වලින් අදේට කුඹුරු කෙටුවා, අපි ගල්වලවල් වල ගල් කැඩුවා, ඒ වගේම අපි ගඩොල් ටික කපුවා, ඒ වගේම අපි හේන් කෙටුවා. එහෙම කරපු කණ්ඩායමක් මේ ඉල්ලන්නේ. තුවාලේ ඇති මිනිහට තුවාලේ භාර දෙන්න. අවුරුදු 70ක් තුවාලේ වැඩි කරපු එවුන් පන්නන්න ඕනේ. 2020දී අපි සූදානම් වෙලා තියෙනවා තුවාල කාරයන් අතර ඉන්න හොඳ සමාජ බුද්ධියක් තිබෙන, හැකියාවක් තියෙන, ජනයා ගැන හිතන, රට ගැන හිතන මිනිස්සු එක පෙරමුණකට ගේන්න. මහා දැවැන්ත ජන පෙරමුණක් හදනවා. ඒක මේ අවුරුද්දේ අවසානයේ හෝ ලබන අවුරුද්දේ එළියට අපි ගේනවා. මහා ජන පෙරමුණක් ගොඩ නගන්න දැන් වැඩ ආරම්භ කරලා තියෙන්නේ.” යැයිද ඒ මහතා වැඩිදුරටත් පැවසීය.

බදුල්ල දෙමළ බාලිකා විද්‍යාලයේ විදුහල්පතිනියට බලපෑම් කර දණ ගැස්වූවා යැයි කියන සිද්ධිය සම්බන්ධයෙන් සැකපිට අධිකරණයට ඉදිරිපත් කළ ඌව මහ ඇමැති චාමර සම්පත් දසනායක මහතා ඇප මත මුදා හරින ලෙස බදුල්ල මහේස්ත්‍රාත් නයන්ත සමරතුංග මහතා නියෝග කළේය.
 
ඔහුට රුපියල් ලක්ෂ දෙකක ශරීර ඇප නියම විය.
 
දසනායක මහතා අධිකරණයට ඉදිරිපත් කරනු ලැබුවේ අද උදෑසන පොලිසියට භාර වීමෙන් පසුවය.

මහ බැංකු බැඳුම්කර ජනාධිපති විමර්ශන කොමිසමේ වාර්තාව සහ බරපතළ වංචා විමර්ශන ජනාධිපති කොමිසමේ වාර්තාව අද(23) පස්වරු 1.00ට පාර්ලිමේන්තුව රැස්වීමෙන් අනතුරුව සභාගත කර තිබේ.

මේ සම්බන්ධයෙන් විශේෂ පක්ෂ නායක රැස්වීමක් ඊයේ(22) පෙරවරුවේ පාර්ලිමේන්තු සංකීර්ණයේ දී පැවැත්විය.

කථානායක කරු ජයසූරිය මහතාගේ ප‍්‍රධානත්වයෙන් පැවති මෙම පක්ෂ නායක රැස්වීමේ දී බැඳුම්කර කොමිෂන් වාර්තාව සහ බරපතළ වංචා විමර්ශන වාර්තාව පිළිබඳ විවාදය පවත්වන දිනය පිළිබඳ සාකච්ඡා වී තිබේ.

කෙසේ වෙතත් හෙට දිනයේ දී යළි පක්ෂ නායක රැස්වීමක් පවත්වා ඒ පිළිබඳ අවසන් තීරණයක් ගනු ඇති බව නියෝජ්‍ය කථානායක තිලංග සුමතිපාල මහතා සඳහන් කළේය.

පෙබරවාරි මස 10 වන දිනට පෙර අදාළ කොමිෂන් සභා වාර්තා සම්බන්ධයෙන් විවාදය පැවැත්විය යුතු බවට විපක්ෂය වශයෙන් යෝජනා කරන බව ජනතා විමුක්ති පෙරමුණේ ප‍්‍රචාරක ලේකම් පාර්ලිමේන්තු මන්ත‍්‍රි විජිත හේරත් මහතා සඳහන් කළේය.

මහ බැංකු බැඳුම්කර ජනාධිපති විමර්ශන කොමිසමේ වාර්තාව සහ බරපතළ වංචා විමර්ශන ජනාධිපති කොමිසමේ වාර්තාව පාර්ලිමේන්තුවේ සභාගත කරමින් කතානායකවරයා නිකුත් කළ විශේෂ නිවේදනය පහතින්,

ගරු කථානායකතුමා විසින් අද දින (2018.01.23 ) දින පාර්ලිමේන්තුවේදී ඉදිරිපත් කරන ලද නිවේදනය

ගරු මන්ත්‍රීවරුනී, අපගේ ව්‍යවස්ථාදායකයේ දැනට බලාත්මකව පවතින ස්ථාවර නියෝග 1993 අවසාන වරට සංශෝධනය වීමෙන් අනතුරුව වසර 25කට අද තත්ත්වයන්ට ගැලපෙන පරිදි වෙනසක් වි නොමැති බව අප කවුරුත් හොඳින් දන්නා කාරණයකි. කෙසේවෙතත්, මහත්වූ පරිශ්‍රමයක ප්‍රතිඵලයක් ලෙස අදට යෝග්‍ය පරිදි ප්‍රතිශෝධිත ස්ථාවර නියෝගවල අවසාන කෙටුම්පත් පිටපත සලකා බලා අද දින පාර්ලිමේන්තුව විසින් සම්මත කිරීමට සියලු කටයුතු සූදානම් කර තිබුණද, එම වැදගත් කාර්යය නැවත වරක් 2018 පෙබරවාරි මස 19 වැනි සඳුදාට කල් දැමීමට සිදුවිය. කෙසේ වෙතත්, මෙම ක්‍රියාවලිය පෙබරවාරි 19 වැනි දින සමාප්ත කර ගැනීමට මා ඉතාමත් ගෞරවයෙන් මෙම සභාවෙන් අවධාරණයෙන් යුතුව ඉල්ලා සිටිනවා.

තවද, පාර්ලිමේන්තු මන්ත්‍රීවරුන්ගෙන් අපේක්ෂා කරනු ලබන අවශ්‍ය විශිෂ්ඨතා මට්ටම සම්බන්ධයෙන් මහජන විශ්වාසය ඇති කිරීම පිණිසත්, පාර්ලිමේන්තුවේ කැපවීම සහතික කිරීම පිණිසත් අවශ්‍ය පාර්ලිමේන්තු මන්ත්‍රීවරුන් සඳහා චර්යා ධර්ම සංග්‍රහය ද පාර්ලිමේන්තුව විසින් අනුමත කර ගැනීම මඟින් ආදර්ශමත් පාර්ලිමේන්තුවක් ලෙස වැඩ කටයුතු කිරීමට අධිෂ්ඨාන කර ගනිමු. පාර්ලිමේන්තුවේ සභානායකතුමා විසින් වාර්තා දෙක ඉදිරිපත් කිරීමෙන් පසුව ගරු කථානායකතුමා විසින් කරනු ලැබීමට නියමිත නිවේදනය
ගරු මන්ත්‍රීවරුනී, අද දින ගරු පාර්ලිමේන්තුවේ සභානායකතුමා විසින් ලිපිලේඛනාදිය පිළිගැන්වීම යටතේ මෙම ගරු සභාවට ඉදිරිපත් කරන ලද 2015 පෙබරවාරි මස 01 වැනි දින සිට 2016 මාර්තු මස 31 වැනි දින දක්වා කාල පරිච්ඡේදය තුළ ශ්‍රී ලංකා මහ බැංකුව විසින් භාණ්ඩාගාර බැඳුම්කර නිකුත් කිරීම පිළිබඳව සහ බරපතළ වංචා දූෂණ, රාජ්‍ය සම්පත්, වරප්‍රසාද, බලය සහ අධිකාරය අනිසි ලෙස භාවිතා කිරීම සම්බන්ධයෙන් පරීක්ෂා කර වාර්තා කිරීම සඳහා පත් කරන ලද ජනාධිපති කොමිෂන් සභාවල වාර්තා සම්බන්ධයෙන් මේ දක්වා සිදුවී තිබෙන ක්‍රියාදාමය මේ ගරු සභාවටත්, ශ්‍රී ලංකාවාසී ජනතාවටත් නිරවද්‍ය කරුණු ගෙන හැර දැක්වීම පාර්ලිමේන්තුවේ කථානායකවරයා වශයෙන් මාගේ යුතුකමක් ලෙස මා සලකනවා.

මේ වසර ආරම්භයේදී මෙම කොමිෂන් සභා වාර්තා අතිගරු ජනාධිපතිතුමා විසින් නිකුත් කිරීමෙන් අනතුරුව 2018 ජනවාරි මස 23 වැනි දින අපර භාග 1.00 දක්වා සාමාන්‍ය පරිදි කල් තබන ලද පාර්ලිමේන්තුව කලින් කැඳවනු ලැබිය යුතු බවට එක්සත් ජනතා නිදහස් සන්ධානයේ මහ ලේකම්තුමා සහ ගරු දිනේෂ් ගුණවර්ධන මැතිතුමා විසින් ඉල්ලීම් කර තිබූ අතරම, විරුද්ධ පාර්ශ්වයේ ප්‍රධාන සංවිධායක, ගරු අනුර දිසානායක මැතිතුමන් විසින් මේ පිළිබඳ සාකච්ඡා කිරීමට හැකිවන පරිදි පාර්ලිමේන්තු කටයුතු පිළිබඳ කාරක සභා රැස්වීමක් කැඳවන ලෙසද ඉල්ලීමක් කර තිබුණි.

ඒ අනුව ගරු පාර්ලිමේන්තුවේ සභානායකතුමන් සමග සාකච්ඡා කළ අතර ජනවාරි මස 09 වැනි අඟහරුවාදා අපර භාග 2.00 ට පාර්ලිමේන්තු කටයුතු පිළිබඳ කාරක සභාවේ රැස්වීමක්ද, මාගේ යෝජනාව මත පසුදින, එනම් ජනවාරි මස 10 වැනි දින, පාර්ලිමේන්තුව කලින් කැඳවන ලෙසට ස්ථාවර නියෝග 14 යටතේ ගරු අග්‍රාමාත්‍යතුමාගෙන් ඉල්ලීමක්ද ලැබී තිබුණි.

ජනවාරි මස 10 වැනි දින පාර්ලිමේන්තු කටයුතු පිළිබඳ කාරක සභා රැස්වීමේදී සාකච්ඡා කර තීරණය කරන ලද පරිදි ස්ථාවර නියෝග 14 යටතේ පාර්ලිමේන්තුව කැඳවීම ගැන සභා ගර්භයේදී ගරු අග්‍රාමාත්‍යතුමා විසින් කරුණු පැහැදිලි කිරීමෙන් පසු අනෙකුත් පක්ෂ නායකයන්ටද කථා කිරීමට අවස්ථාවක් ලබා දීමට එකඟතාවය පළ කරන ලදී.

පාර්ලිමේන්තුවට බැඳුම්කර වාර්තාවේ සහ බරපතළ වංචා විමර්ශන වාර්තාවල පිටපත් ලබා දෙන ලෙස මා විසින් විසින් ඒ වන විටත් අතිගරු ජනාධිපතිතුමාගෙන් ඉල්ලා තිබූ බවද පාර්ලිමේන්තු කටයුතු පිළිබඳ කාරක සභා රැස්වීමේදී සඳහන් කරන ලදී. පසුදින පැවැත්වීමට තිබූ පාර්ලිමේන්තු රැස්වීමට ප්‍රථම එකී වාර්තා ලබා ගැනීම අවශ්‍ය බැවින්, එම ඉල්ලීම නැවත ඉදිරිපත් කරන ලෙස ගරු පාර්ලිමේන්තුවේ සභානායකවරයා විසින් එතුමාගේ ලේකම්වරයාටද උපදෙස් ලබාදී එකී වාර්තා පිටපත් පාර්ලිමේන්තුවට ඉදිරිපත් කිරීමට කටයුතු කරන ලෙස ඉල්ලා ජනාධිපති ලේකම්වරයාටද ලිඛිතව දන්වා තිබුණි.

ජනවාරි මස 10 වැනි දින පෙරවරු කාලයේදී අතිගරු ජනාධිපතිතුමන් විසින් නීතිපතිවරයාගේ උපදෙස් මත මහ බැංකුවේ අධිපතිවරයාටත්, අල්ලස් දූෂණ කොමිසමටත් පිටපත් යැවිය යුතු හෙයින් පාර්ලිමේන්තුවට අදාළ පිටපත් ජනවාරි මස 17 වැනි දින ඉදිරිපත් කිරීමට කටයුතු කරන බව ජනාධිපති ලේකම්වරයා විසින් ලිඛිතව දන්වා එවා තිබුණි.

එමෙන්ම බරපතල වංචා, දූෂණ, රාජ්‍ය සම්පත්, වරප්‍රසාද, බලය සහ අධිකාරිය අනිසි ලෙස භාවිතා කිරීම (PRCIFAC) සම්බන්ධයෙන් විමර්ශනය කිරීමට පත්කරන ලද ජනාධිපති පරීක්ෂණ කොමිෂන් සභා වාර්තාව සම්පූර්ණ වශයෙන් පාර්ලිමේන්තුවට ඉදිරිපත් කරන ලෙසද එදිනම ඉල්ලීමක් කර තිබුණි. පාර්ලිමේන්තුවේ රැස්වීම පැවැත්වෙන අතරවාරයේදී ජනාධිපති ලේකම්වරයා විසින් මේ සම්බන්ධයෙන් මා‍ වෙත එවන ලද ලිපියද මා විසින් ජනවාරි මස 10 වැනි දින සභාවට ඉදිරිපත් කරන ලදී.

අතිගරු ජනාධිපතිවරයා විසින් 2018 ජනවාරි මස 17 වැනි දින 2015 පෙබරවාරි මස 01 වැනි දින සිට 2016 මාර්තු මස 31 වැනි දින දක්වා කාල පරිච්ඡේදය තුළ ශ්‍රී ලංකා මහ බැංකුව විසින් භාණ්ඩාගාර බැඳුම්කර නිකුත් කිරීම පිළිබඳ කොමිෂන් සභාවේ වාර්තාවේ පිටපත් 26 ක්ද, බරපතළ වංචා දූෂණ, රාජ්‍ය සම්පත්, වරප්‍රසාද, බලය සහ අධිකාරය අනිසි ලෙස භාවිතා කිරීම සම්බන්ධයෙන් පරීක්ෂා කර වාර්තා කිරීම සඳහා පත් කරන ලද ජනාධිපති කොමිෂන් සභාවේ අවසන් වාර්තාව සහ ඊට අදාළ වෙන් වෙන් වශයෙන් ගොනු කරන ලද පරීක්ෂණ වාර්තා 34 ක්ද, ජනාධිපති ලේකම්වරයා විසින් පාර්ලිමේන්තුවේ මහ ලේකම්වරයා වෙත එවන ලදී. එකී වාර්තාවල පිටපත් ගරු මන්ත්‍රීවරුන්ට ලබා දීමට හැකිවන පරිදි ඒවා තිබෙන භාෂාවෙන් මුද්‍රණය කරගැනීම පිළිබඳ සාකච්ඡා කිරීමට රජයේ මුද්‍රණාලයාධිපතිනිය මා විසින් පාර්ලිමේන්තුවට කැඳවා දීර්ඝ වශයෙන් සාකච්ඡා කරන ලදී.

එම වාර්තාවල පිටු ප්‍රමාණය අති විශාල වුවත් කෙසේ හෝ මහත් පරිශ්‍රමයක් දරා 2018 ජනවාරි මස 23 වැනි දින පාර්ලිමේන්තුවට එවීමට පොරොන්දු වූ පරිදි අද දින ශ්‍රී ලංකා මහ බැංකුව විසින් භාණ්ඩාගාර බැඳුම්කර නිකුත් කිරීම පිළිබඳ කොමිෂන් සභාවේ වාර්තාවේ සහ බරපතළ වංචා දූෂණ, රාජ්‍ය සම්පත්, වරප්‍රසාද, බලය සහ අධිකාරය අනිසි ලෙස භාවිතා කිරීම සම්බන්ධයෙන් පරීක්ෂා කර වාර්තා කිරීම සඳහා පත් කරන ලද ජනාධිපති කොමිෂන් සභාවේ අවසන් වාර්තාවේ පිටපත් මන්ත්‍රීවරුන්ට බෙදාදීමට හැකිවන ආකාරයට මුද්‍රණය කර සභාවේ විශේෂ අවසරය පරිදි තිබෙන භාෂාවෙන් පිළිගැන්වීමට කටයුතු යොදා තිබෙනවා.

තවද, බරපතළ වංචා දූෂණ, රාජ්‍ය සම්පත්, වරප්‍රසාද, බලය සහ අධිකාරය අනිසි ලෙස භාවිතා කිරීම සම්බන්ධ අවසාන වාර්තාවට අදාළ පරීක්ෂණ වාර්තා 34 පාර්ලිමේන්තුවේ විශේෂ අධීක්ෂණය යටතේ රජයේ මුද්‍රණාලයේදී ස්කෑන් කර එම වාර්තා CD තැටියක අන්තර්ගත කර සියලුම ගරු මන්ත්‍රීවරුන්ට හැකි විගස ලබාදීමට කටයුතු කරමින් පවතින බවද දන්වා සිටිමි.කෙසේ වෙතත්, ශ්‍රී ලංකා මහ බැංකුව විසින් භාණ්ඩාගාර බැඳුම්කර නිකුත් කිරීම පිළිබඳව වාර්තාවේ වෙළුම් තුනක් තිබෙන බවටත්, සලකුණු කළ ලේඛන සහ සාක්ෂි පාර්ලිමේන්තුවට භාරදී නොමැති බවට කැෆේ ව්‍යාපාරය විසින් මාගෙන් ලිඛිතව විමසන ලදුව මාගේ උපදෙස් පරිදි පාර්ලිමේන්තුවේ මහ ලේකම්වරයා විසින් මේ පිළිබඳ ලිඛිතව විමසන ලදී.

ඊට පිළිතුරු වශයෙන් එකී වාර්තාවට වෙළුම් නොමැති බවත්, සලකුණු කළ වාර්තා සහ සාක්ෂි පාර්ලිමේන්තුවට එවන ලද වාර්තාවේ අන්තර්ගත කර තිබෙන බවත් ජනාධිපති ලේකම්වරයා විසින් කැෆේ සංවිධානයේ විධායක අධ්‍යක්ෂවරයාට ලිඛිතව දන්වා එවා තිබෙන බවත් මෙම ගරු සභාවට දන්වා සිටිනවා.

කරුණු මෙසේ හෙයින්, එම වාර්තා සම්බන්ධයෙන් සාවද්‍ය මත සමාජගත කිරීම සුදුසු නොවන බවද අවසාන වශයෙන් දන්වා සිටිමි.

මහ බැංකු මංකොල්ලයට සම්බන්ධ සියලු දෙනාට එරෙහිව නීතිය කි‍්‍රයාත්මක කරමින් ඔවුන්ට දඬුවම් ලබාදීම සඳහා අග‍්‍රාමාත්‍යවරයා ප‍්‍රමුඛ පක්ෂ විපක්ෂ සියලු දෙනා තමන්ට සහය ලබාදිය යුතු බව ජනාධිපති මෛත්‍රීපාල සිරිසේන මහතා පවසයි.

ඒ සඳහා තමන් ශක්තිමත් කරනවා මිස කිසිදු අවස්ථාවක තමාව දුර්වල කිරීමට ඔවුන් කටයුතු නොකළ යුතු බව ද ජනාධිපතිවරයා අවධාරණය කළේ ඊයේ (22) පස්වරුවේ මහනුවර ප‍්‍රදේශයේ පැවති ජනහමුවක් අමතමිනි.

2014 වසරේ තමන් පැවති රජයෙන් ඉවත්වූ විට එදා ශී‍්‍ර ලංකා නිදහස් පාක්ෂිකයින් තමාට චෝදනා කළ අතර අද එක්සත් ජාතික පාක්ෂිකයින් ද තමාට චෝදනා නගමින් සිටින බව පැවසූ ජනාධිපතිවරයා තමා එම කිසිදු පාක්ෂිකයෙකුට ද්‍රෝහි වූවා නොව තමා සැමදා කටයුතු කරන්නේ දූෂණයට, වංචාවට, හොරකමට, නාස්තියට සහ ඒකාධිපතිවාදයට මෙන්ම පවුල්වාදයට එරෙහිව බව ද ජනාධිපතිවරයා මෙහිදී කියා සිටියේය.

යහපාලන ආණ්ඩුව අසමත් බැවින් තමන් සමග එක්වන ලෙස හිටපු නායකයා කර ඇති ප‍්‍රකාශය ද මෙහිදී සිහිපත් කළ ජනාධිපතිවරයා කියා සිටියේ තමන් තෙවරක්ම අසමත් වූ අයුරු අද ඔහුට අමතක වී ඇති බවයි.

බලයේ සිටීමට වසර දෙකක් තිබියදී ජනාධිපතිවරණයකට ගියේ රටට එල්ලවී ඇති ජාත්‍යන්තර අභියෝගවලට මෙන්ම අධික ණය බරත් සමග රට හමුවේ තිබූ ආර්ථික අර්බුදයට මුහුණදීමට තිබෙන අසමත්භාවය නිසා වන අතරම, 2015 ජනවාරි 08 වනදා ජනාධිපතිවරණයෙන් ඔහු දෙවන වරටත් අසමත්වූ අතර, ඉන්පසු පැවති පාර්ලිමේන්තු මැතිවරණයේදී තෙවන වරටත් අසමත් වූ අන්දම ද ජනාධිපතිවරයා සිහිපත් කළේය.

මහින්දගෙන් රවීට සුබ පැතුම්

අද මහබැංකු වාර්තාව ගැන වේදිකාවේ කෑ ගසන හිටපු නායකයා හිටපු මුදල් අමාත්‍ය රවී කරුණානායක මහතාට එරෙහිව පාර්ලිමේන්තුවේ විශ්වාසභංගයක් ගෙන ආ අවස්ථාවේ පාර්ලිමේන්තුවට පැමිණ ඒ සඳහා ඡන්දය භාවිතා නොකර රවී කරුණානායක මහතා පාර්ලිමේන්තුවෙන් පිට වූ විගස දුරකථන ඇමතුමක් ලබාදී ඔහුට සුබ පැතූ අයුරු ද තමා හොඳින් දන්නා බව ජනාධිපතිවරයා පැවසීය.

එමෙන්ම මහ බැංකු බැඳුම්කර වාර්තාව පිළිබඳ කුමන අන්දමින් කතා කළත් මෙම මහා මංකොල්ලය සිදුව ඇත්තේ 2008 වසරේ සිට බව ශ්‍රේෂ්ඨාධිකරණ විනිසුරුවරුන් පෙන්වා දී තිබෙන බව ඔවුන් අමතක නොකළ යුතු බවද ජනාධිපතිවරයා පැවසීය.

අද රට කඩනවා, රට විකුණනවා යැයි වේදිකාවේ කෑ ගසන ඔහු ලංකා ඉතිහාසයේ කිසිදු නායකයෙකු සිදු නොකළ අන්දමින් කොළඹ වරාය නගරයට අක්කර 240 ක් සින්නක්කර ඔප්පුවකින් චීන සමාගමකට පවරාදීමට සැලසුම් සකස් කර තිබූ ආකාරයත්, යුද්ධය දිනූ ශ්‍රේෂ්ඨ රණවිරුවන්ට යුද හමුදා මූලස්ථානයක් අහිමි කරමින් යුද හමුදා මූලස්ථානය පැවති අක්කර 06 ක භූමිය සින්නක්කර ඔප්පුවකින් ෂැන්ග‍්‍රිල්ලා සමාගමට පවරාදුන් අන්දමත් ජනාධිපතිවරයා සිහිපත් කළේය.

කන්ද උඩරට ඓතිහාසික 1818 කැරැල්ල සිදුවී වසර 200 ක් සපිරෙන මේ මොහොතේ රට බේරා ගැනීමට තිබෙන ඊළඟ සටන දූෂණයට එරෙහි සටන බව මෙහිදී අවධාරණය කළ ජනාධිපතිවරයා අද පිරිසිදු දේශපාලන ව්‍යාපාරයක අයිතිය සහ උරුමය තිබෙන්නේ ශී‍්‍ර ලංකා නිදහස් පක්ෂයට පමණක් බවත් නොකිලිටි දේශපාලන ව්‍යාපාරයක් වූ ශී‍්‍ර ලංකා නිදහස් පක්ෂය සමග අත්වැල් බැඳ ගනිමින් සමෘද්ධිමත් රටක් ගොඩනැගීමට මෙම පෙබරවාරී 10 වනදා රටේ සියලූ ජනතාව පෙළගැසිය යුතු බවත් ප‍්‍රකාශ කළේය.

එම වීඩියෝව පහතින්,

පාසල් විදුහල්පතිනියක් දණ ගැස්සවීමේ සිද්ධියක් සම්බන්ධයෙන් ඌව පළාත් මහ ඇමති චාමර සම්පත් දසනායක මහතා පොලීසියට බාර වී තිබේ.

නීතිඥයෙන් මාර්ගයෙන් ඒ මහතා අද(23) දින බදුල්ල පොලීසියට බාර වී ඇත.

කෙසේ වෙතත් එහිදී මහ ඇමතිවරයා පොලිසිය විසින් අත්අඩංගුවට ඇති බවයි වාර්තා වේ.

මේ අතර ඌව පළාත් ප්‍රධාන අමාත්‍ය චාමර සම්පත් දසනායක අත්අඩංගුවට ගන්නා ලෙස ඉල්ලමින් බදුල්ල දෙමළ මහා විද්‍යාලයේ දෙමාපියන් පිරිසක් ඊයේ (22) එම විදුහල ඉදිරිපිට විරෝධතාවයක නිරත විය.

මෙම විදුහලේ විදුහල්පතිනිය දණ ගැස්සවීමේ සිද්ධිය සම්බන්ධයෙන් ඌව පළාත් ප්‍රධාන අමාත්‍යවරයාට චෝදනා එල්ල විය.

අත්අඩංගුවට ගත් ඔහු අද දින බදුල්ල මහේස්ත්‍රාත් අධිකරණය වෙත ඉදිරිපත් කිරීමට නියමිතයි.

ඌව පළාත් ප්‍රධාන අමාත්‍ය චාමර සම්පත් දසනායක මහතා විදුහල්පතිනියක දණ ගැස්වූ බව කියන සිද්ධිය සම්බන්ධ පරීක්ෂණ කඩිනමින් අවසන් කර ඔහු වරදක් කර ඇත්නම් පළාත් පාලන මැතිවරණයට පෙර පියවරක් ගත යුතු යැයි ශ්‍රී ලංකා නිදහස් පක්ෂයේ ජාතික සංවිධායක, අමාත්‍ය සුසිල් ප්‍රේමජයන්ත මහතා පවසයි.

පසුගිය රජය සමයේ රතුපස්වල ඇතිවූ සිද්ධිය සම්බන්ධ නිසි පියවරක් නොගැනීම නිසා ශ්‍රීලනිප ඡන්ද පදනමක් ඇති ගම්පහ දිස්ත්‍රික්කය පසුගිය ජනාධිපතිවරණයේදී ඡන්ද 4000කින් පැරදුණු බව ද අමාත්‍යවරයා සඳහන් කළේය.

ඉදිරියේදී පළාත් පාලන ආයතන සඳහා ප්‍රධානීන් පත්කිරීමේදී හොඳම පුද්ගලයින් පත්කිරීම පක්ෂයේ අපේක්ෂාව බවත් පක්ෂයේ මැතිවරණ ප්‍රකාශනය ඉදිරිපත් කර ඇත්තේ ද ‘පිරිසිදු පාලනයක් උදෙසා‘ යන තේමාව යටතේ බවත් ඔහු පෙන්වා දුන්නේය.

නූගත් හා සුදුසුකම් නොමැති අය තනතුරුවලට පත්වීම නිසා ගැටලූ ඇතිවන බව පෙන්වා දුන් අමාත්‍යවරයා ඉදිරියේදී තනතුරක් දෙන විට ඔවුන්ගේ සාමාන්‍ය දැනීම හෝ පරීක්ෂා කළ බැලිය යුතු බවද කියා සිටියේය.

හිටපු ප්‍රධාන අමාත්‍යවරයෙක් වන තමන් ඌව ප්‍රධාන අමාත්‍යවරයාගේ ක්‍රියාව කිසිසේත් අනුමත නොකරන බවත් ළමුන් පාසලට ඇතුළත් කිරීමේදී කිසිවෙකුට අසාධාරණයක් වී ඇත්නම් නිලධාරීන් හරහා පරීක්ෂණයක් කළ හැකි අතර රාජකාරී කටයුතු සඳහා කාර්යාලයක් ඇති බැවින් කිසිවෙකු නිල නිවසට කැඳවිය යුතු නැති බවත් අමාත්‍යවරයා අවධාරණය කළේය.

ඔහු මේ බව පැවසුවේ කොළඹ, ඩාර්ලි පාරේ පිහිටි ශ්‍රීලනිප මූලස්ථානයේදී ඊයේ (22) පැවති මාධ්‍ය හමුවක් අමතමිනි.

මේ වසරේදී රුසියාවේ පැවැත්වෙන පාපන්දු ලෝක කුසලාන තරගාවලියට සමගාමීව එහි ජයග්‍රාහකයන් වෙනුවෙන් ලබා දෙන ලෝක කුසලානය ලෝකයේ රටවල්වල ප්‍රදර්ශනය කිරීමට සමගාමීව එම කුසලානය ප්‍රථමයෙන්ම ශ්‍රී ලංකාවට ගෙන ඒමට නියමිතය.

ඒ සඳහා විශේෂිත ගුවන් යානයක් සූදානම් කර ඇති අතර අද සවස කුසලානය රැගෙන එම යානය කටුනායක ගුවන් තොටුපළට ළඟා වීමට නියමිතය. රටවල් 51ක් තුළ ප්‍රදර්ශනය කිරීමට නියමිතය.

ජනාධිපති මෛත්‍රීපාල සිරිසේන මහතා විසින් අද රාත්‍රියේ කුසලානය මහ ජනතාවට ප්‍රදර්ශනය කිරීම නිල වශයෙන් සිදු කිරීමට නියමිතය. හෙට එය මහජනතාවගේ දැක ගැනීම වෙනුවෙන් බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශ්‍රයේ තැබීමට නියමිතය.

Page 1 of 1677